തിരുവനന്തപുരം: എ ഐ ക്യാമറകള് പ്രവര്ത്തനം തുടങ്ങിയതോടെ സംസ്ഥാനത്ത് അപകടമരണങ്ങള് പകുതിയായി കുറഞ്ഞുവെന്ന് ഗതാഗത വകുപ്പ് മന്ത്രി ആന്റണി രാജു. കഴിഞ്ഞവര്ഷം ജൂണില് വാഹനാപകടങ്ങളില് 344 പേര് മരിച്ചപ്പോള് എ ഐ ക്യാമറകള് പ്രവര്ത്തനം തുടങ്ങിയ ഈ വര്ഷം ജൂണില് അത് 140 ആയി കുറഞ്ഞുവെന്നും മന്ത്രി പറഞ്ഞു. കേശവദാസപുരം റസ്റ്റ് റൂമിന്റെയും പട്ടത്തെയും പൊട്ടക്കുഴിയിലെയും ഹൈടെക് ബസ് ഷെല്ട്ടറുകളുടെയും ഉദ്ഘാടനം നിര്വഹിച്ച് സംസാരിക്കുകയായിരുന്നു അദ്ദേഹം. വാഹന അപകടങ്ങളില്പ്പെട്ട് ആശുപത്രിയില് എത്തുന്നവരുടെ എണ്ണത്തിലും ഗണ്യമായ കുറവുണ്ടായിട്ടുണ്ട്.
ക്യാമറകള് സ്ഥാപിക്കും മുന്പ് നാലര ലക്ഷത്തോളം ആയിരുന്നു വാഹന നിയമലംഘനങ്ങള്. ഇപ്പോള് ഇത് നാലിലൊന്നായി കുറഞ്ഞുവെന്നും മന്ത്രി പറഞ്ഞു. നഗരത്തിലെ യാത്ര സൗകര്യങ്ങളില് വലിയ വര്ദ്ധനവാണ് ഉണ്ടായിരിക്കുന്നത്. ഓണത്തിന് മുന്പ് പുതിയ 113 സിറ്റി സര്ക്കുലര് ബസുകള് ഉള്പ്പെടെ 163 ഇലക്ട്രിക് ബസുകള് സര്വീസ് നടത്തുമെന്നും അദ്ദേഹം പറഞ്ഞു.
