വയനാട്: അതിശക്തമായ മഴയെ തുടര്ന്ന് വയനാട് ജില്ലയില് മലയോരപ്രദേശങ്ങളിലേക്കുള്ള ട്രക്കിംഗിന് നിരോധനം ഏര്പ്പെടുത്തി. ദുരന്ത സാധ്യത കണക്കിലെടുത്ത് ക്വാറികളുടെ പ്രവര്ത്തനത്തിനും യന്ത്രസഹായത്തോടെയുള്ള മണ്ണെടുപ്പിനും ജില്ലാ ദുരന്ത നിവാരണ അതോറിറ്റി നിരോധനം ഏര്പ്പെടുത്തിയിട്ടുണ്ട്. അതേസമയം മഴ മുന്നറിയിപ്പുള്ള സാഹചര്യത്തില് ജനങ്ങള് ജാഗ്രത പാലിക്കണമെന്ന് ജില്ലാ കലക്ടര് ഡോ. രേണു രാജ് അറിയിച്ചു. മലയോര മേഖലകളിലേക്കുള്ള രാത്രിയാത്ര പരമാവധി ഒഴിവാക്കണം. മണ്ണിടിച്ചില് ഉള്പ്പടെയുള്ള ദുരന്തസാധ്യതയുള്ളതിനാല് മലയോരമേഖലകളില് താമസിക്കുന്നവര് ജാഗ്രത പാലിക്കണമെന്നും ആവശ്യമായ ഘട്ടത്തില് മാറിതാമസിക്കണമെന്നും ജില്ലാ കലക്ടര് അറിയിച്ചു.
മേപ്പാടി ഗ്രാമപഞ്ചായത്തിലെ തൊള്ളായിരം കണ്ടിയിലേക്കുള്ള വിനോദസഞ്ചാരികളുടെ പ്രവേശനത്തിനും താത്കാലിക വിലക്ക് ഏര്പ്പെടുത്തിയിട്ടുണ്ട്. ജലാശയങ്ങളില് പെട്ടെന്ന് വെള്ളം ഉയരാന് സാധ്യതയുള്ളതിനാല് പുഴയോരത്ത് താമസിക്കുന്ന ജനങ്ങള് ജാഗ്രത പാലിക്കണം. ശക്തമായ മഴ പെയ്യുന്ന സാഹചര്യത്തില് ഒരു കാരണവശാലും പുഴകളോ, തോടുകളോ മുറിച്ച് കടക്കാനോ, പുഴകളിലോ മറ്റ് ജലാശയങ്ങളിലോ കുളിക്കാനോ, മീന് പിടിക്കാനോ മറ്റ് ആവശ്യങ്ങള്ക്കോ ഇറങ്ങാനും പാടില്ലെന്നും ജില്ലാ കലക്ടര് അറിയിച്ചു.
