മസ്കത്ത്: മസ്കത്തില്‍നിന്ന് കണ്ണൂരിലേക്കും ഹൈദരാബാദിലേക്കുമുള്ള എയര്‍ ഇന്ത്യയുടെ സര്‍വീസുകള്‍ നിര്‍ത്തുന്നു. സെപ്റ്റംബര്‍ 11നാണ് ഇവിടെനിന്നും അവസാനമായി സര്‍വീസ് ഷെഡ്യൂള്‍ ചെയ്തിട്ടുള്ളത്. യാത്രക്കാര്‍ കുറഞ്ഞതാണ് സേവനം നിര്‍ത്താന്‍ കാരണമെന്ന് കരുതുന്നു. ചൊവ്വ, വെള്ളി, ഞായര്‍ എന്നിങ്ങനെ ആഴ്ചയില്‍ മൂന്നു സര്‍വീസുകളായിരുന്നു കണ്ണൂരിലേക്ക് എയര്‍ ഇന്ത്യ നടത്തിയിരുന്നത്. മലബാറിലെ യാത്രക്കാര്‍ക്ക് ഏറെ ഗുണകരമായിരുന്നു ഈ സര്‍വീസുകള്‍. എയര്‍ഇന്ത്യ എക്സ്പ്രസും ഗോ എയറും കണ്ണൂരിലേക്ക് സര്‍വീസ് നടത്തുന്നുണ്ട്.
ഈ ബജറ്റ് വിമാനങ്ങളുടെ സാന്നിധ്യമാണ് എയര്‍ ഇന്ത്യയിലെ യാത്രക്കാര്‍ കുറയാന്‍ കാരണാമായതെന്ന് ട്രാവല്‍ മേഖലയിലുള്ളവര്‍ പറയുന്നു. കേരളത്തിലേക്കുള്ള എയര്‍ ഇന്ത്യയുടെ ഏക സര്‍വിസാണ് നിര്‍ത്താന്‍പോകുന്നത്. നേരത്തേ കൊച്ചിയിലേക്കുണ്ടായിരുന്ന സര്‍വീസായിരുന്നു കണ്ണൂരിലേക്ക് മാറ്റിയിരുന്നത്. ജൂണ്‍ 21ന് ആയിരുന്നു കണ്ണൂരിലേക്ക് സര്‍വീസ് ആരംഭിച്ചത്. നേരത്തേ ബജറ്റ് വിമാന കമ്പനികളായ എയര്‍ ഇന്ത്യ എക്സ്പ്രസ്, ഗോ ഫസ്റ്റുമായിരുന്നു കണ്ണൂരിലേക്ക് സര്‍വീസ് നടത്തിയിരുന്നത്. എയര്‍ ഇന്ത്യകൂടി എത്തിയതോടെ ടിക്കറ്റ് നിരക്കില്‍ നേരിയ കുറവുവന്നിരുന്നു. ബജറ്റ് വിമാനങ്ങളെക്കാള്‍ ടിക്കറ്റ് നിരക്ക് നല്‍കേണ്ടിവന്നതാണ് എയര്‍ ഇന്ത്യയെ ഈ സെക്ടറിലെ യാത്രക്കാര്‍ കൈയൊഴിയാന്‍ കാരണം. ഈമാസം 11ന് ശേഷം മസ്കത്തില്‍നിന്ന് കേരള സെക്ടറിലേക്ക് എയര്‍ ഇന്ത്യയുടെ സര്‍വീസുകളൊന്നും ഉണ്ടായിരിക്കില്ല.
