തിരുവനന്തപുരം : എ.കെ.ജി സെന്ററിനെതിരായ ആക്രമണത്തെ ശക്തമായി അപലപിക്കുന്നുയെന്ന് യു.ഡി.എഫ് കണ്വനീര് എം.എം ഹസന്. കോണ്ഗ്രസാണ് ഇതിന് പിന്നിലെന്ന എല്.ഡി.എഫ് കണ്വീനര് ഇ.പി ജയരാജന്റെ പ്രസ്താവന ശുദ്ധ അസംബന്ധമാണ്. കോണ്ഗ്രസിനോ യു.ഡി.എഫിനോ ഈ അക്രമത്തില് ഒരു പങ്കുമില്ല. ഏത് അന്വേഷണത്തെയും നേരിടാന് തയ്യാറാണെന്നും ഹസന് പറഞ്ഞു.
എ.കെ.ജി സെന്ററിന് മുന്നില് പോലീസ് സംരക്ഷണം ഉണ്ടായിരുന്നു. ഒരു ഗേറ്റില് സി.സി.ടി.വിയും പ്രവര്ത്തിച്ചിരുന്നു. പ്രതിയെ കണ്ടുപിടിക്കാന് സി.സി.ടി.വി ദൃശ്യങ്ങള് ലഭ്യമാണ്. പൊലീസ് അന്വേഷണം നടത്തി അക്രമിയെ കണ്ടുപിടിക്കട്ടെ. രാഹുല് ഗാന്ധിയുടെ കേരള സന്ദര്ശനം നടക്കാന് ഇരിക്കെ അര്ധരാത്രി എ.കെ.ജി സെന്ററിനുനേരെയുള്ള അക്രമത്തില് ദുരൂഹതകളുണ്ട്. ഇത്തരമൊരു അക്രമം നടത്തി അതിന്റെ ഉത്തരവാദിത്തം കോണ്ഗ്രസിന് തലയില് കെട്ടിവെയ്ക്കാന് ചില ഗൂഢശക്തികളുടെ ബോധപൂര്വമായ ശ്രമമുണ്ട്. സി.പി.എം നേതൃത്വം പ്രവര്ത്തകരോട് ആത്മസംയമനം പാലിക്കാന് പറഞ്ഞിട്ടും പത്തനംതിട്ടയില് ഉള്പ്പെടെ വ്യാപകമായി കോണ്ഗ്രസ് ഓഫിസുകള്ക്ക് നേരെ ആക്രമണം നടക്കുകയാണെന്നും ഹസന് പറഞ്ഞു.