പൊന്കുന്നം : മലയോര മേഖലയുടെ കവാടമായ പൊന്കുന്നം ബസ്സ്റ്റാന്ഡിലെ കെ.എസ്.ആര്.ടി.സി സ്റ്റേഷന് മാസ്റ്റര് ഓഫിസ് പൂട്ടി. പഞ്ചായത്ത് കെട്ടിടത്തില് പ്രവര്ത്തിച്ചിരുന്ന ഓഫിസിന്റെ ബോര്ഡും എടുത്തുമാറ്റി. ഇതുമൂലം ദൂരെ സ്ഥലങ്ങളില്നിന്നുമെത്തുന്ന യാത്രക്കാര് ദുരിതത്തിലായി. പൊന്കുന്നത്ത് കെ.എസ്.ആര്.ടി.സി ഡിപ്പോയുണ്ടെങ്കിലും ബസുകള് കയറുന്നതും യാത്രക്കാര് ബസ് കാത്തുനില്ക്കുന്നതും ടൗണിലെ ബസ്സ്റ്റാന്ഡിലാണ്. ഈ സാഹചര്യത്തില് വര്ഷങ്ങള്ക്ക് മുമ്പാണ് സ്റ്റേഷന് മാസ്റ്റര് ഓഫിസ് തുറന്നത്.
ജീവനക്കാരുടെ എണ്ണക്കുറവാണ് കാരണമായി പറയുന്നത്. കണ്ടക്ടര്മാര് അദര് ഡ്യൂട്ടി പ്രകാരം സ്റ്റേഷന് മാസ്റ്ററായി പ്രവര്ത്തിക്കേണ്ടതില്ലെന്ന നിര്ദേശം ലഭിച്ചതായും ഇതിന്റെ അടിസ്ഥാനത്തില് ഓഫിസ് നിര്ത്തലാക്കിയെന്നുമാണ് അറിയുന്നത്. ദൂരെ സ്ഥലങ്ങളില്നിന്നെത്തുന്നവര് കുമളി, കട്ടപ്പന, നെടുങ്കണ്ടം, എറണാകുളം തുടങ്ങിയ സ്ഥലങ്ങളിലേക്കുള്ള ഫാസ്റ്റ് അടക്കം ബസുകളുടെ സമയവിവരം തിരക്കുന്നത് ഇവിടെയായിരുന്നു. സ്വകാര്യ ബസ് ലോബിയെ സഹായിക്കാനാണെന്ന ആക്ഷേപവും ഉയര്ന്നിട്ടുണ്ട്. ഓഫിസ് പുനഃസ്ഥാപിക്കണമെന്ന് യാത്രക്കാര് ആവശ്യപ്പെട്ടു.
