ന്യൂയോര്ക്ക്: ആമസോണില് കൂട്ടപിരിച്ചുവിടല് തുടരുന്നു. ഇത്തവണ ഗെയിമിങ് വിഭാഗത്തില് നിന്നും 100 പേരെയാണ് പുറത്താക്കിയത്. പ്രൈം ഗെയിമിങ്, ഗെയിം ഗ്രോത്ത്, ആമസോണ് ഗെയിംസ് വിഭാഗങ്ങളില് നിന്നുള്ള ജീവനക്കാരെയാണ് പിരിച്ചുവിടുന്നത്. പിരിച്ചു വിടുന്ന ജീവനക്കാരെ ഇക്കാര്യം മുന്കൂട്ടി അറിയിച്ചതായും എല്ലാ വിധ ആനുകൂല്യങ്ങളും ലഭിക്കുമെന്നും റിപ്പോര്ട്ടുകളില് പറയുന്നു. കമ്പനിയുടെ വളര്ച്ച മുന്നിര്ത്തിയാണ് ഇത്തരമൊരു നീക്കമെന്ന് ഗെയിംസ് വൈസ് പ്രസിഡന്റ് ക്രിസ്റ്റഫ് ഹര്ട്ടമാന് ജീവനക്കാര്ക്ക് നല്കിയ മെമോയില് വ്യക്തമാക്കി.
കൂട്ടപിരിച്ചുവിടല് കമ്പനിയുടെ പ്രവര്ത്തനങ്ങള് പുനഃക്രമീകരിക്കുന്നതിനും കാര്യക്ഷമമാക്കുന്നതിനുമുള്ള ശ്രമങ്ങളുടെ ഭാഗമാണ്. ഉള്ളടക്കത്തില് ശ്രദ്ധ കേന്ദ്രീകരിക്കാന് ആമസോണ് പദ്ധതിയിടുകയാണെന്നും അതിന്റെ ആന്തരിക വികസന ശ്രമങ്ങളില് നിക്ഷേപം തുടരുമെന്നും ഹാര്ട്ട്മാന് പറഞ്ഞു. ആമസോണ് 9,000 ജീവനക്കാരെ നേരത്തെ പിരിച്ചുവിട്ടിരുന്നു.
