കൊച്ചി: ഇടുക്കിയെ വിറപ്പിച്ച കാട്ടാന അരിക്കൊമ്പനെ പിടിക്കുന്നതിനെതിരെ ഹൈക്കോടതിയില് ഹര്ജി. അരിക്കൊമ്പനെ പിടികൂടി കോടനാട് സൂക്ഷിക്കാനുള്ള വനം വകുപ്പിന്റെ ഉത്തരവിനെതിരെയാണ് ഹര്ജി. തിരുവനന്തപുരം ആസ്ഥാനമായ മൃഗസംരക്ഷണ സംഘടനയാണ് ഹര്ജി സമര്പ്പിച്ചത്. ഉത്തരവ് ഗസറ്റില് പ്രസിദ്ധപ്പെടുത്താതെ രഹസ്യമായി വച്ചിരിക്കുന്നുവെന്നും ആനയെ മനുഷ്യവാസമില്ലാത്ത വനമേഖലയില് തുറന്നു വിടണമെന്നും ഹര്ജിയില് ആവശ്യപ്പെടുന്നു. ഉത്തരവ് അശാസ്ത്രീയമാണെന്നും അരോപിക്കുന്നുണ്ട്. ഹര്ജി നാളെ കേരള ഹൈക്കോടതി ചീഫ് ജസ്റ്റിസിന്റെ ബെഞ്ച് പരിഗണിക്കും.
അതേസമയം ദൗത്യത്തിന്റെ ഭാഗമായി ആളുകളെ ബോധവല്ക്കരിക്കുന്ന നടപടികള് ചിന്നക്കനാല് പഞ്ചായത്ത് തുടങ്ങിയിട്ടുണ്ട്. ശാന്തന്പാറ, ചിന്നക്കനാല് ഗ്രാമ പഞ്ചായത്തുകളിലെ ചില വാര്ഡുകളില് 26ന് നിരോധനാജ്ഞ പ്രഖ്യാപിച്ചു. ഈ ദിവസങ്ങളില് എല്ലാം വിനോദ സഞ്ചാരികള്ക്കു നിയന്ത്രണം ഏര്പ്പെടുത്തും. 26ന് ദൗത്യം നടന്നില്ലെങ്കില് 27ന് നടപ്പിലാക്കും. അരിക്കൊമ്പനെ പിടികൂടാന് വായനാട്ടില്നിന്നും വിക്രം, സൂര്യന് എന്ന കുങ്കിയാനകള് ഇതിനകം ജില്ലയില് എത്തിക്കഴിഞ്ഞു. ഇതുകൂടാതെ, കൊമ്പനെ പിടികൂടാനായി സിമന്റ് പാലത്തിന് സമീപം താല്ക്കാലിക റേഷന് കടയുടെ കെണിയൊരുക്കിയിരിക്കുകയാണ് വനം വകുപ്പ്.
