തിരുവനന്തപുരം : തെരഞ്ഞെടുപ്പിലുണ്ടായ അപ്രതീക്ഷിത പരാജയത്തെക്കുറിച്ച് ഇടതുപക്ഷ ജനാധിപത്യ മുന്നണി വിശദമായ പരിശോധന നടത്തുമെന്ന് സിപിഐ നേതാവ് ആനി രാജ അറിയിച്ചു. എവിടെയാണ് വീഴ്ച പറ്റിയതെന്നും കഴിഞ്ഞ അഞ്ച് വർഷത്തെ പ്രവർത്തനങ്ങളിൽ ജനങ്ങൾക്ക് എവിടെയാണ് വിശ്വാസം നഷ്ടപ്പെട്ടതെന്നും ഗൗരവമായി ചർച്ച ചെയ്യുമെന്നും അവർ വ്യക്തമാക്കി. ചെറിയ ഭൂരിപക്ഷത്തിനെങ്കിലും വിജയിക്കുമെന്ന് പ്രതീക്ഷിച്ചിരുന്നതായും എന്നാൽ ഇപ്പോഴുണ്ടായ ഫലം തികച്ചും അപ്രതീക്ഷിതമാണെന്നും ആനി രാജ പറഞ്ഞു.
ഈ ജനവിധി വ്യക്തിപരമായി തനിക്ക് അവിശ്വസനീയമാണെന്നും അവർ അഭിപ്രായപ്പെട്ടു. ഇടതുപക്ഷത്തിനും സിപിഐക്കും സ്ഥിരമായി ലഭിച്ചിരുന്ന കമ്മ്യൂണിസ്റ്റ് അനുഭവ വോട്ടുകളിൽ ഇത്തവണ വലിയ രീതിയിലുള്ള നഷ്ടം സംഭവിച്ചതായാണ് പ്രാഥമിക വിലയിരുത്തൽ. ഇത് ഇടതുപക്ഷ ജനാധിപത്യ മുന്നണിയുടെ ഗവൺമെന്റ് ആയതിനാൽ പരാജയത്തിന്റെ ഉത്തരവാദിത്തം മുന്നണിക്ക് മൊത്തത്തിലുണ്ടെന്നും വരും ദിവസങ്ങളിൽ യോഗം ചേർന്ന് നയപരമായ കാര്യങ്ങളിലടക്കം പരിശോധന നടത്തുമെന്നും അവർ പറഞ്ഞു.
