റാന്നി : മന്ദമരുതി – വെച്ചൂച്ചിറ റോഡില് പറമ്പില് നിന്നും വെട്ടിമാറ്റിയ ഉണക്കപ്പുല്ലുകളും കാടുകളും റോഡിന് നടുവില് ഉപേക്ഷിക്കുന്നത് പതിവാകുന്നു. കുന്നം ആനമാടത്തിന് സമീപത്തയാണ് സാമൂഹ്യ വിരുദ്ധര് ഇത്തരത്തില് പറമ്പുകളില് നിന്നും വെട്ടിമാറ്റിയ പുല്ലുകള് റോഡില് ഉപേക്ഷിക്കുന്നത്. റോഡിന് നടുവില് കിടന്ന് ഉണങ്ങുന്ന പുല്ലുകള് മഴപെയ്യുമ്പോള് വെള്ളം പിടിച്ച് വഴുക്കലുള്ളതായി മാറുകയും ഇരുചക്ര വാഹനയാത്രക്കാര് തെന്നി വീണ് അപകടം സംഭവിക്കുകയും ചെയ്യും. ഇത് ആരാണ് കൊണ്ടുവന്ന് ഇടുന്നത് എന്നതില് വ്യക്തതയില്ല. ഉണങ്ങിയ പുല്ലുകള് റോഡില് പറ്റിപ്പിടിച്ചാല് ഇളക്കി മാറ്റുവാനും പ്രയാസമാണ്.
വളവുകളിലും ഇറക്കത്തിലും ഇത്തരത്തില് ചെയ്യുന്നതാണ് കൂടുതലും അപകടങ്ങള്ക്ക് കാരണമാകുന്നത്. രാത്രി സമയങ്ങളില് ഇത്തരത്തില് അപകടം നടന്നാല് നേരം പുലര്ന്നിട്ടാവും ജനങ്ങള് അറിയുന്നത്. നിരവധി വാഹനങ്ങള് ഈ റോഡിലൂടെ സഞ്ചരിക്കുന്നുണ്ട്. ഇത്തരം സംഭവങ്ങള് ഏറെക്കാലമായി ഈ പ്രദേശത്ത് തുടരുന്നതായാണ് നാട്ടുകാര് പറയുന്നത്. ആരെങ്കിലും ഇത് മനപ്പൂര്വ്വം ചെയ്യുന്നതാണെന്ന നിഗമനത്തിലാണ് നാട്ടുകാര്.
