റാന്നി: കോവിഡ് മഹാമാരി മൂലം ശോഭകെട്ടുപോയ ഓണാഘോഷങ്ങൾക്ക് ഇത്തവണ നിറം പകരാനായി അറയ്ക്കമൺ പൗരസമിതി. നാറാണംമൂഴി ഗ്രാമപഞ്ചായത്തിലെ അത്തിക്കയം അറയ്ക്കമൺ ജംഗ്ഷനിൽ ഈ മാസം നാലിനാണ് ഓണാഘോഷ പരിപാടികൾ ഒരുക്കിയിരിക്കുന്നത്. നടൻ പന്തുകളി മത്സരം, കുട്ടികളുടെയും സ്ത്രീകളുടെയും കലാകായിക പരിപാടികൾ, അത്തപ്പൂക്കള മത്സരം, വടംവലി മത്സരം, ഓണസദ്യ എന്നിവ നടത്തപ്പെടും. രാവിലെ 9 ന് തുടങ്ങുന്ന ഓണാഘോഷ പരിപാടികൾ റാന്നി എം എൽ എ അഡ്വ. പ്രമോദ് നാരായണൻ ഉദ്ഘാടനം ചെയ്യും.
കലാകായിക മത്സരങ്ങൾക്ക് ശേഷം വൈകീട്ടു 7 ന് നടക്കുന്ന പൊതു സമ്മേളനം ആന്റോ ആന്റണി എം പി ഉദ്ഘാടനം ചെയ്യും. യോഗത്തിൽ വിവിധ രാഷ്ട്രീയ സാമൂഹിക പ്രവര്ത്തകര് പങ്കെടുക്കും. തുടർന്ന് രാത്രി 9 മണിയോടെ പ്രശസ്ത ടി.വി താരങ്ങളെ ഉൾപ്പെടുത്തി സിനിമാ താരം കോബ്ര രാജേഷ് നയിക്കുന്ന മെഗാഷോയും ഉണ്ടായിരിക്കുന്നതാണ്.
