പത്തനംതിട്ട: എസ്.എസ്.എൽ.സി, ഹയർ സെക്കൻഡറി, സി.ബി.എസ്.ഇ, ഐ.സി.എസ്.ഇ പരീക്ഷകളിൽ ഉന്നത വിജയം കൈവരിച്ച ആറന്മുള മണ്ഡലത്തിലെ വിദ്യാർത്ഥികൾക്കായി സംഘടിപ്പിക്കുന്ന മെറിറ്റ് അവാർഡ് ദാന ചടങ്ങ് നാളെ രാവിലെ 9.30-ന് പത്തനംതിട്ട റോയൽ ഓഡിറ്റോറിയത്തിൽ നടക്കും. ആറന്മുള എം.എൽ.എ അബിൻ വർക്കി കോടിയാട്ട് ഏർപ്പെടുത്തിയ അവാർഡ് ദാന ചടങ്ങ് നിയമസഭാ ഡെപ്യൂട്ടി സ്പീക്കർ അഡ്വ. ഷാനിമോൾ ഉസ്മാൻ ഉദ്ഘാടനം ചെയ്യും.
എം.എൽ.എ അബിൻ വർക്കി കോടിയാട്ട് അധ്യക്ഷത വഹിക്കുന്ന ചടങ്ങിൽ പ്രശസ്ത ഗായകൻ കെ.എസ്. ഹരിശങ്കർ മുഖ്യാതിഥിയായി പങ്കെടുക്കും. ആന്റോ ആന്റണി എം.പി, ജില്ലാ കളക്ടർ എ. നിസാമുദ്ദീൻ, ജില്ലാ പോലീസ് മേധാവി ആർ. ആനന്ദ് എന്നിവർ ആദരിക്കൽ ചടങ്ങിൽ പങ്കെടുക്കും. ചടങ്ങിന്റെ ഭാഗമായി ജവഹർ ബാൽ മഞ്ച് ദേശീയ ചെയർമാൻ ഡോ. ജി.വി. ഹരി വിദ്യാർത്ഥികൾക്കായി പരിശീലന ക്ലാസ് നയിക്കും. ആറന്മുളയിലെ ഹയർ സെക്കൻഡറി വിദ്യാർത്ഥി എം.എൽ.എക്കായി തയ്യാറാക്കിയ ഓൺലൈൻ പോർട്ടലിന്റെ പ്രകാശനവും ഇതേ വേദിയിൽ വെച്ച് നടക്കും.
