കോന്നി : കല്യാണത്തില് പങ്കെടുത്ത ശേഷം തിരികെ മടങ്ങിയ കോന്നി സ്വദേശിയായ ട്രാവലര് ഡ്രൈവര്ക്കും വാഹനത്തിലുണ്ടായിരുന്നവര്ക്കും നേരെ മദ്യപസംഘത്തിന്റെ ആക്രമണം. സ്ത്രീകള് ഉള്പ്പെടെയുള്ളവര്ക്ക് മര്ദ്ദനമേറ്റു. വാഹനത്തിന്റെ ഡ്രൈവര് രതീഷിന് കണ്ണിന് പരിക്കേറ്റിട്ടുണ്ട്. സ്ത്രീകളും കുട്ടികളും അടങ്ങുന്ന ഇരുപതോളം യാത്രക്കാരാണ് വാഹനത്തില് ഉണ്ടായിരുന്നത്. കൊട്ടാരക്കരയില് വിവാഹത്തില് പങ്കെടുത്ത് തിരികെ മടങ്ങവേ ഇവരുടെ വാഹനത്തിന് കുറുകെ മറ്റൊരു കാര് നിര്ത്തിയിടുകയായിരുന്നു.
മാര്ഗ്ഗ തടസ്സം സൃഷ്ടിച്ച വാഹനം മാറ്റുവാനായി രതീഷ് ഹോണ് മുഴക്കിയതാണ് കാറില് ഉണ്ടായിരുന്നവരെ പ്രകോപിതരാക്കിയത്. കാറില് നിന്നും പുറത്തിറങ്ങിയ സംഘം ട്രാവലര് പിന്തുടര്ന്ന് വഴിയില് തടഞ്ഞ് നിര്ത്തുകയും ഭീകരാന്തരീക്ഷം സൃഷ്ടിച്ച് ആക്രമിക്കുകയുമായിരുന്നു. അക്രമത്തില് രതീഷിന് കണ്ണിന് പരിക്കേല്ക്കുകയും ട്രാവലറിലുണ്ടായിരുന്ന സ്ത്രീകള്ക്ക് മര്ദ്ദനമേല്ക്കുകയുമായിരുന്നു.
