ഇടുക്കി: അരിക്കൊമ്പന് കുമളിയില്നിന്ന് എട്ടു കിലോമീറ്റര് അകലെ ലോവര് ക്യാംപ് പവര് ഹൗസിനു സമീപം വനത്തിലെത്തിയതായി ജിപിആര്എസ് സിഗ്നലുകള്. കേരള അതിര്ത്തി വിട്ട് അരിക്കൊമ്പന് തമിഴ്നാട് അതിര്ത്തിയിലേക്ക് പ്രവേശിച്ചതായാണ് വനംവകുപ്പ് അറിയിച്ചത്. അരിക്കൊമ്പന്റെ ഇപ്പോഴത്തെ സഞ്ചാരപാത ചിന്നക്കനാല് ദിശയിലാണ്. കൊട്ടാരക്കാര – ഡിണ്ടിഗല് ദേശീയപാത മുറിച്ചുകടന്നാണ് അരിക്കൊമ്പന്റെ നീക്കം.
ഇന്നലെ രാത്രി മുതല് വെള്ളിയാഴ്ച രാവിലെ വരെ തേക്കടി വനമേഖലയുടെ പരിസരത്തായിരുന്നു അരിക്കൊമ്പന്റെ സ്ഥാനം. ജനവാസമേഖലയ്ക്ക് 100 മീറ്റര് അടുത്ത് റോസാപ്പൂകണ്ടം ഭാഗത്ത് എത്തിയതിനെ തുടര്ന്ന് ആകാശത്തേക്ക് വെടിയുതിര്ത്ത് ശബ്ദമുണ്ടാക്കി ആനയെ കാട്ടിലേക്കു തന്നെ തുരത്തുകയായിരുന്നു. ജിപിഎസ് സിഗ്നലുകളില് നിന്നാണ് അരിക്കൊമ്പന്റെ സാന്നിധ്യം മനസിലാക്കിയത്. ഇന്നലെ രാത്രി പതിനൊന്നു മണിക്കു ശേഷമാണ് അരിക്കൊമ്പനെ ഇവിടെ കണ്ടത്. പിന്നീട് വനപാലകര് ആനയെ കാട്ടിലേക്കു തന്നെ തുരത്തി.
