ഇടുക്കി: അരിക്കൊമ്പന്‍ എന്ന കാട്ടാനയെ പിടികൂടാനുള്ള ദൗത്യത്തിന്റെ തീയതി മാറ്റി. 26 ആം തീയതിയിലാണ് അരിക്കൊമ്പനെ മയക്ക് വെടി വെക്കുക. കുങ്കിയാനകള്‍ എത്താന്‍ വൈകിയതും പ്ലസ് വണ്‍ പരീക്ഷകള്‍ നടക്കുന്നതുമാണ് തീയതി മാറ്റാന്‍ കാരണം. ഇടുക്കിയിലെ ചിന്നക്കനാല്‍, ശാന്തന്‍പാറ മേഖലയില്‍ നാശം വിതയ്ക്കുന്ന കാട്ടാനയാണ് അരിക്കൊമ്പന്‍. സൂര്യനെല്ലി ബി എല്‍ റാം ഭാഗത്ത് ഗതാഗതം നിരോധിച്ച് കനത്ത ജാഗ്രതയിലാണ് ഓപറേഷന്‍ അരിക്കൊമ്പന്‍ നടപ്പാക്കുക. അരിക്കൊമ്പന്‍ തകര്‍ത്ത കെട്ടിടം തന്നെ തെരഞ്ഞെടുത്ത് ഇഷ്ടഭക്ഷണമായ അരിവച്ച് കെണി ഒരുക്കും. എത്തിയാലുടന്‍ മയക്കുവെടിവച്ച് പിടികൂടും.
മെരുക്കാന്‍ നാല് കുംകി ആനകളാണ് എത്തുക. മുത്തങ്ങയില്‍നിന്ന് കുംകിയാനയായ വിക്രമും പരിപാലകരായ മണി, രഘു, കുമാര്‍ എന്നിവരും തിങ്കളാഴ്ചയെത്തി. ഇന്നലെ വൈകിട്ട് വയനാട്ടില്‍ നിന്നും പുറപ്പെട്ട സൂര്യന്‍ പതിമൂന്ന് മണിക്കൂര്‍ സഞ്ചരിച്ച് ഇന്ന് രാവിലെ ആറരയോടെയാണ് ചിന്നക്കനാലില്‍ എത്തിയത്. നാളെ കുഞ്ഞു, സുരേന്ദ്രന്‍, എന്നീ ആനകളെ കോടനാട്ടില്‍നിന്ന് കൊണ്ടുവരും. വനം വകുപ്പിന്റെ 11 സംഘങ്ങളിലായി 71 അംഗ ദ്രുതപ്രതികരണ സേനയാണ് ദൗത്യത്തിനുള്ളത്.
