അഞ്ചാലുംമൂട് : ഭാര്യവീട്ടില് അക്രമം നടത്തിയതിന് പിടികൂടി സ്റ്റേഷനില് എത്തിച്ച പ്രതി പോലീസുകാരെ ആക്രമിച്ചു. ചവറ തെക്കുംഭാഗം കോയിവിളയില് കുളത്തൂര് വീട്ടില് ജയിംസണ് ആണ് (25) അഞ്ചാലൂംമൂട് പോലീസ് സ്റ്റേഷനിലെ പാറാവ് ഡ്യൂട്ടിയിലായിരുന്ന സുനില് ലാസറിനെയും ജി.ഡി ചാര്ജ് ഉണ്ടായിരുന്ന ഗുരുപ്രസാദിനെയും ആക്രമിച്ചത്. 30ന് അഞ്ചാലുംമൂട് സ്റ്റേഷന് പരിധിയിലെ മതിലില് കാട്ടുവിള പുത്തന് വീട്ടിലെ കൃഷ്ണകുമാറിന്റെ വീട്ടിലാണ് ഇയാള് ആദ്യം അക്രമം നടത്തിയത്. മദ്യപിച്ച് ഭാര്യാവീട്ടിലെത്തിയ ഇയാള് ഭാര്യയോടും ഭാര്യാമാതാവുമായും തര്ക്കത്തിലാവുകയും അസഭ്യം വിളിച്ച് വീട്ടില് ആക്രമണം നടത്തുകയുമായിരുന്നു.
കൃഷ്ണകുമാറിന്റെ പരാതിയില് അഞ്ചാലുംമൂട് പപോലീസ് ജയിംസനെ സ്റ്റേഷനില് എത്തിച്ചു. സ്റ്റേഷനിലെത്തിച്ച ഇയാള് തുടര്ന്നും അസഭ്യം പറയുന്നത് തടഞ്ഞ പാറാവ് ഡ്യൂട്ടിയിലുണ്ടായിരുന്ന പപോലീസുകാരനെ യുവാവ് ആക്രമിക്കുകയായിരുന്നു. അക്രമം തടയാന് ശ്രമിക്കവേ ജി.ഡി ചാര്ജിലുണ്ടായിരുന്ന ഗുരുപ്രസാദിനെയും ആക്രമിച്ചു. തുടര്ന്ന് അഞ്ചാലുംമൂട് പോലീസ് സ്റ്റേഷന് ഇന്സ്പെക്ടര് സി.ദേവരാജന്റെ നിര്ദേശാനുസരണം കൃത്യനിര്വഹണത്തിനിടെ ഉദ്യോഗസ്ഥനെ ആക്രമിച്ചതിന് കേസ് രജിസ്റ്റര് ചെയ്ത് പ്രതിയെ കോടതിയില് ഹാജരാക്കി റിമാന്ഡ് ചെയ്തു.
