അട്ടപ്പാടി : ആള്‍ക്കൂട്ട ആക്രമണത്തില്‍ കൊല്ലപ്പെട്ട അട്ടപ്പാടിയിലെ ആദിവാസി യുവാവ് മധുവിന്റെ കുടുംബത്തിനെതിരെ പട്ടികജാതി പട്ടികവര്‍ഗ കമ്മിഷന്‍. ഇതുവരെയില്ലാത്ത ആരോപണങ്ങള്‍ അമ്മയും സഹോദരിയും ഉന്നയിക്കുന്നതിന് പിന്നില്‍ മറ്റാരുടെയോ പ്രേരണയുണ്ടെന്ന് കമ്മിഷനംഗം എസ്.അജയകുമാര്‍ പറഞ്ഞു. പലതും സംശയത്തിനിടയാക്കുന്നതാണ്. സ്പെഷല്‍ പബ്ലിക് പ്രോസിക്യൂട്ടര്‍ കോടതിയില്‍ ഹാജരാകാതിരുന്നത് ബോധപൂര്‍വമെന്ന് തെളിഞ്ഞാല്‍ നടപടിയുണ്ടാകുമെന്നും അജയകുമാര്‍ പറഞ്ഞു. മധുവിന്റെ കുടുംബത്തിന് നീതി കിട്ടണമെന്ന കാര്യത്തില്‍ സര്‍ക്കാരിന് രണ്ട് അഭിപ്രായമില്ല. എന്നാല്‍ മധുവിന്റെ അമ്മയും സഹോദരിയും പുതുതായി ഉന്നയിക്കുന്ന കാര്യങ്ങള്‍ പലതും വിശ്വാസ്യയോഗ്യമല്ല.
ആരുടെയോ പ്രേരണയ്ക്കു വഴങ്ങിയെന്ന് കമ്മിഷന്‍ സംശയിക്കുന്നു. കോടതിയില്‍ ഹാജരാകാതിരുന്ന സ്പെഷല്‍ പബ്ലിക് പ്രോസിക്യൂട്ടറോട് വിശദീകരണം തേടിയിട്ടുണ്ട്. അസുഖമാണെന്ന ന്യായം പൂര്‍ണമായും അംഗീകരിക്കാനാകില്ല. കോടതിയിലെത്താത്തത് ബോധപൂര്‍വമെന്ന് തെളിഞ്ഞാല്‍ കമ്മിഷന്‍ നടപടിയെടുക്കും. കമ്മിഷന്‍ പലതവണ മധുവിന്റെ കുടുംബത്തെ നേരില്‍ കണ്ടിരുന്നതാണ്. കേസില്‍ കൂടുതല്‍ പ്രതികളുണ്ടെന്നും ആക്രമിക്കാന്‍ ചിലര്‍ ശ്രമിക്കുന്നതായുമുള്ള കാര്യങ്ങള്‍ കുടുംബം പറയുന്നതിലാണ് അസ്വാഭാവികതയെന്നും അജയകുമാര്‍ വ്യക്തമാക്കി.
