പാലക്കാട് : അട്ടപ്പാടി മധുകൊലക്കേസ് പ്രതികളുടെ ജാമ്യം റദ്ദാക്കണമെന്ന ഹര്ജി ഈ മാസം 16 ലേക്ക് മാറ്റി. മണ്ണാര്ക്കാട് എസ് സി എസ് ടി കോടതിയുടേതാണ് നടപടി. സാക്ഷി വിസ്താരം ഇനി ഹര്ജി പരിഗണിച്ച ശേഷം മാത്രമേ ഉണ്ടാകൂ. പ്രതികള് സാക്ഷികളെ സ്വാധീനിച്ചതിനാല് ജാമ്യം റദ്ദാക്കണം എന്നായിരുന്നു പ്രോസിക്യൂഷന് ആവശ്യം. അട്ടപ്പാടി മധുകൊലക്കേസില് ഇന്നു മുതല് അതിവേഗ വിസ്താരം തുടങ്ങാനിരിക്കുകയായിരുന്നു. 25 മുതല് 31 വരെയുള്ള ഏഴ് സാക്ഷികളെ മണ്ണാക്കാട് എസ് സി എസ് ടി കോടതിയില് വിസ്തരിക്കാനിരിക്കുകയായിരുന്നു .
വിചാരണ വേഗത്തിലാക്കാന് വേണ്ടി ഇന്നുമുതല് ദിവസേനെ അഞ്ചുപേരെ വിസ്തരിക്കാനായിരുന്നു തീരുമാനം. കഴിഞ്ഞ ദിവസം ഹാജരാകാതിരുന്ന ക്രെയിന് ഡ്രൈവര്മാരായ ഇരുപത്തി അഞ്ചാം സാക്ഷി രാജേഷ് , ഇരുപത്തി ആറാം സാക്ഷി ജയകുമാര് എന്നിവരടക്കം, ഏഴുപേരെ വിസ്തരിക്കാനാണ് തീരുമാനിച്ചിരുന്നത്. ഇതുവരെ വിസ്തരിച്ച സാക്ഷികളില് 13 പേര് കൂറുമാറിയിരുന്നു. സാക്ഷികള് കൂട്ടത്തോടെ കൂറ് മാറുന്ന സാഹചര്യത്തിലാണ് പ്രതികളുടെ ജാമ്യം റദ്ദാക്കണം എന്ന് പ്രോസിക്യൂഷന് ആവശ്യപ്പെട്ടത്.