തണ്ണിത്തോട് : തണ്ണിത്തോട് ഗ്രാമ പഞ്ചായത്തിന്റെ ഉടമസ്ഥതയിലുള്ള മിനി സ്റ്റേഡിയം പുനര്നിര്മാണവുമായി ബന്ധപ്പെട്ട ദുരൂഹത അവസാനിപ്പിക്കണമെന്ന് യു.ഡി.എഫ് തണ്ണിത്തോട് മണ്ഡലം കമ്മറ്റി ആവശ്യപ്പെട്ടു. നിലവില് ഉപയോഗിച്ചുകൊണ്ടിരിക്കുന്ന സ്റ്റേഡിയം സര്ക്കാര് ഫണ്ട് ഉപയോഗിച്ച് പുനര് നിര്മ്മാണം നടത്തി വരികയാണ്. സ്റ്റേഡിയത്തില് ഉണ്ടായിരുന്ന സംരക്ഷണ ഭിത്തി പൊളിച്ചുമാറ്റി ഹിറ്റാച്ചി ഉപയോഗിച്ച് അഞ്ഞൂറിലധികം ലോഡ് മണ്ണ് എടുക്കുകയും പഞ്ചായത്ത് അറിയാതെ ഈ മണ്ണ് സാമ്പത്തിക നേട്ടത്തിനായി എം.എല്.എ യുടെ അറിവോടെ കടത്തുവാന് ശ്രമിച്ചു എന്നുമാണ് ആരോപണം. മണ്ണ് കടത്ത്തുവാനുള്ള ശ്രമം നാട്ടുകാരും യു.ഡി.എഫ് പ്രവര്ത്തകരും ചേര്ന്ന് തടയുകയും പഞ്ചായത്ത് അധികൃതരെ അറിയിക്കുകയും ചെയ്തിരുന്നു. ഉടന് തന്നെ മണ്ണ് കടത്തുവാന് ഉപയോഗിച്ച വാഹനം ആരുടെയോ നിര്ദേശപ്രകാരം അവിടെ നിന്നും മാറ്റുകയും ചെയ്തു.
തണ്ണിത്തോട് ഗ്രാമ പഞ്ചായത്ത് അറിയാതെ നടത്തിയ ഈ നിര്മ്മാണ പ്രവര്ത്തനങ്ങളുടെ നിജസ്ഥിതി ഉടന് വെളിച്ചത്ത് കൊണ്ടുവരണമെന്ന് ആവശ്യപ്പെട്ടുകൊണ്ട് ജില്ലാ കളക്ടര്ക്കും വിജിലന്സിനും പരാതി നല്കുവാനും യു.ഡി.എഫ് തണ്ണിത്തോട് മണ്ഡലം കമ്മറ്റി തീരുമാനിച്ചു. പ്രതിഷേധ യോഗം യു.ഡി.എഫ് നിയോജക മണ്ഡലം ചെയര്മാന് എബ്രഹാം വാഴയില് യോഗം ഉത്ഘാടനം ചെയ്തു. യു.ഡി.എഫ് തണ്ണിത്തോട് മണ്ഡലം ചെയര്മാന് സജി കളയ്ക്കാട്ട് അധ്യക്ഷത വഹിച്ചു. അജയന് പിള്ള ആനിയ്ക്കനാട്ട്, ബിജു മാത്യു താന്നിമൂട്ടില്, കെ.വി സാമുവേല് കിഴക്കേതില് എന്നിവര് പ്രസംഗിച്ചു.
