കോന്നി : പ്രായമായ സ്ത്രീയുടെ കയ്യില്നിന്നും നഷ്ടപ്പെട്ട സ്വര്ണ്ണവും പണവും തിരികെ നല്കി കോന്നിയിലെ ഓട്ടോ ഡ്രൈവര്മാര് മാതൃകയായി. ഉച്ചയ്ക്ക് ഒരു മണിയോടെ കോന്നി ചാങ്കൂര് മുക്കില് നിന്നും കോന്നിയിലേക്ക് ഓട്ടോറിക്ഷയില് വന്ന അമ്മയുടെ പക്കല് ഉണ്ടായിരുന്ന 1.5 പവന് സ്വര്ണ്ണവും പണം അടങ്ങിയ പഴ്സുമാണ് ഓട്ടോയില് മറന്നു വെച്ചത്. പഴ്സ് നഷ്ടപ്പെട്ടത് അറിഞ്ഞ ഇവര് കോന്നിയിലെ ഓട്ടോ സ്റ്റാന്റില് എത്തി പരിഭ്രാന്തിയില് നടക്കുന്നത് കണ്ട് കാര്യം തിരക്കിയ ഓട്ടോ ഡ്രൈവറോട് വിവരം പറയുകയും ഡ്രൈവര് തങ്ങളുടെ വാട്സ് ആപ് ഗ്രൂപ്പില് സന്ദേശം നല്കുകയും ചെയ്തു. തുടര്ന്ന് പഴ്സ് ആരുടെ കയ്യിലാണ് കിട്ടിയത് എന്നറിയാന് ഓട്ടോ ഡ്രൈവര്മാര് പരസ്പരം ഫോണ് വിളിച്ച് അന്വേഷണം നടത്തുകയും ചെയ്തു.
സന്ദേശം ഞൊടിയിടയില് കോന്നിയിലെ എല്ലാ ഓട്ടോ ഡ്രൈവര്മാര്ക്കും ലഭിക്കുകയും പഴ്സ് ആരുടെ വാഹനത്തിലാണ് നഷ്ടപ്പെട്ടത് എന്ന് കണ്ടെത്തുകയുമായിരുന്നു. പഴ്സ് കണ്ടെത്തിയ ശേഷം ഓട്ടോ ഡ്രൈവര്മാര് ചേര്ന്ന് ഇത് അമ്മയ്ക്ക് കൈമാറുകയും ചെയ്തു. നഷ്ടപ്പെട്ട് പോയെന്ന് കരുതിയ സ്വര്ണ്ണവും പണവും തിരികെ ലഭിച്ച സന്തോഷത്തില് കോന്നിയിലെ ഓട്ടോ ഡ്രൈവര്മാര്ക്ക് നന്ദിയും അറിയിച്ചാണ് അമ്മ കോന്നിയില് നിന്നും മടങ്ങിയത്.
