തൃശൂര് : പുതുക്കാട് പാലപ്പിള്ളി കാരികുളം ഗ്രൗണ്ടിനു സമീപം അവശനിലയില് കണ്ടെത്തിയ കാട്ടാനക്കുട്ടിചരിഞ്ഞു. ദിവസങ്ങള് മാത്രം പ്രായമുള്ള ആനക്കുട്ടി കാനയില് വീണ നിലയിലായിരുന്നു. നാട്ടുകാരാണ് രക്ഷിച്ചത്. വെള്ളിക്കുളങ്ങര ഫോറസ്റ്റ് അധികൃതര് സ്ഥലത്തെത്തി. അവശനിലയിലായ ആനക്കുട്ടിക്ക് ഫോറസ്റ്റ് വെറ്ററിനറി സര്ജന്റെ നേതൃത്വത്തില് ചികിത്സ നല്കിയെങ്കിലു ഇന്ന് ചരിയുകയായിരുന്നു. കാട്ടാനക്കുഞ്ഞിന് വീഴ്ചയില് ഗുരുതരപരിക്കുകള് ഉണ്ടായിരുന്നു. ഇന്നലെ പുലര്ച്ചെയായിരുന്നു ആനക്കുട്ടി കാനയില് വീണത്.
ഏറെസമയം ആനക്കൂട്ടം കുട്ടിയാനയെ കരയ്ക്കു കയറ്റാന് ശ്രമിച്ചെങ്കിലും നടക്കാതായതോടെ 12 ഓളം വരുന്ന കാട്ടാനകള് ഇതിനെ ഉപേക്ഷിച്ചു കാടുകയറി. പുലര്ച്ചെ പ്രദേശവാസികള് ആനക്കൂട്ടത്തിന്റെ ബഹളം കേട്ടിരുന്നു. നാട്ടുകാര് പ്രദേശത്തെത്തി കരച്ചില് കേട്ടു തിരച്ചില് നടത്തിയപ്പോഴാണു കാനയില് വീണ കുട്ടിയാനയെ കണ്ടെത്തിയത്. പ്രദേശവാസികള് ചേര്ന്ന് ഇതിനെ കരയ്ക്കു കയറ്റി. നാട്ടുകാര് അറിയിച്ചതിനെ തുടര്ന്നാണു വനംവകുപ്പ് വാച്ചര്മാരും വനപാലകരും സ്ഥലത്തെത്തിയത്.
