താലിബാന്: സ്ത്രീകളുടെ ബ്യൂട്ടി സലൂണുകള് ഒരു മാസത്തിനകം അടച്ചുപൂട്ടണമെന്ന് ഉത്തരവിട്ട് അഫ്ഗാനിലെ താലിബാന് ഭരണകൂടം. കാബൂളിലും മറ്റ് പ്രവിശ്യകളിലും സ്ത്രീകളുടെ ബ്യൂട്ടി സലൂണുകളുടെ പ്രവര്ത്തനത്തിന് നിരോധനം ഏര്പ്പെടുത്തിക്കൊണ്ട് ഇസ്ലാമിക് എമിറേറ്റ് നേതാവ് ഉത്തരവ് പുറപ്പെടുവിച്ചു. അഫ്ഗാനിസ്ഥാനിലെ സ്ത്രീകളുടെ അവകാശങ്ങള്ക്കേറ്റ ഏറ്റവും പുതിയ പ്രഹരമായി മാറിയിരിക്കുകയാണ് ഈ വിഷയം. കഴിഞ്ഞ വര്ഷം രാജ്യത്തെ പെണ്കുട്ടികള്ക്കുള്ള ഹൈസ്കൂളുകളും സര്വകലാശാലകളും അടച്ച് പൂട്ടിയിരുന്നു.
പെണ്കുട്ടികള്ക്ക് ആറാം ക്ലാസ് വിദ്യാഭ്യാസം നേടാനെ ഇപ്പോള് രാജ്യത്തെ നിയമം അനുവദിക്കുന്നൊള്ളൂ. പിന്നാലെ സര്ക്കാര്, സ്വകാര്യ ജോലികളില് നിന്ന് സ്ത്രീകളെ പിരിച്ച വിട്ടു. പൊതുകുളിമുറികള്, ജിമ്മുകള്, പാര്ക്കുകള് തുടങ്ങിയ പൊതു സ്ഥലങ്ങളില് സ്ത്രീകള്ക്ക് വിലക്കേര്പ്പെടുത്തി. ബന്ധുവായ പുരുഷന്റെ കൂടെ മാത്രമേ സ്ത്രീകള്ക്ക് വീട്ടില് നിന്നും പുറത്തിറങ്ങാന് പറ്റൂ. മറിച്ച് ഒറ്റയ്ക്ക് പുറത്തിറങ്ങുന്ന സ്ത്രീകളെ വാഹനങ്ങളില് കയറ്റരുതെന്നും താലിബാന് വിധിച്ചു.
