ബെംഗളൂരു : പുതുവത്സര ആഘോഷങ്ങള്ക്ക് ബെംഗളൂരുവില് കര്ശന നിയന്ത്രണവുമായി പോലീസ്. 31 ന് വൈകിട്ട് ആറ് മുതല് ജനവരി ഒന്നിന് ആറ് വരെ ബെംഗളൂരുവില് നിരോധനാജ്ഞ പ്രഖ്യാപിച്ചിട്ടുണ്ട്. ആളുകള് കൂട്ടംകൂടി നില്ക്കാന് അനുവദിക്കില്ല. കൊവിഡിന്റെ പശ്ചാത്തലത്തിലാണ് നിയന്ത്രണങ്ങള് കര്ശനമാക്കിക്കൊണ്ടുള്ള നടപടി. 11 മണിക്ക് ശേഷമുള്ള പുതുവത്സര ആഘോഷങ്ങള്ക്കും വിലക്കുണ്ട്. 11 ന് ശേഷം എല്ലാ സ്ഥാപനങ്ങളും അടയ്ക്കണമെന്നും പോലീസ് അറിയിച്ചു.
രാത്രി 8 മുതല് രാവിലെ 6 വരെ വിധാന് സൗധ പരിസരങ്ങളില് വാഹനങ്ങള്ക്ക് നിയന്ത്രണം ഏര്പ്പെടുത്തിയിട്ടുണ്ട്. എംജി റോഡ്, ബ്രിഗേഡ് റോഡ്, ചര്ച്ച് സ്ട്രീറ്റ്, മ്യൂസിയം റോഡ്, റെസിഡന്സി റോഡ്, റെസ്റ്റ് ഹൗസ് റോഡ് എന്നിവിടങ്ങളില് അടിയന്തര വാഹനങ്ങള് ഒഴികെയുള്ള എല്ലാത്തരം വാഹനങ്ങള്ക്കും നിരോധനം ബാധകമാണ്. ഇതുകൂടാതെ ഇന്ദിരാനഗര്, കോരമംഗല ഉള്പ്പെടെയുള്ള സിബിഡി പ്രദേശങ്ങളിലെ പബ്ബുകളിലേക്കും റെസ്റ്റോറന്റുകളിലേക്കും പ്രവേശനം മുന്പാസുകളോ കൂപ്പണുകളോ ഉപയോഗിച്ച് മാത്രമേ അനുവദിക്കൂ. പാര്ട്ടി അംഗങ്ങള്ക്ക് പോലീസിന് പാസ് കാണിച്ച് ഈ സ്ഥലങ്ങളിലേക്ക് പോകാം.
മദ്യപിച്ച് വാഹനമോടിക്കുന്നത് തടയാന് 668 സ്ഥലങ്ങളില് പരിശോധനകള് ശക്തമാക്കുന്നതിന് ട്രാഫിക് പോലീസിനെ നിയോഗിച്ചതായി ജോയിന്റ് പോലീസ് കമ്മീഷണര് (ട്രാഫിക്) ബി ആര് രവികാന്ത ഗൗഡ പറഞ്ഞു. ലംഘിക്കുന്നവര്ക്കെതിരെ കേസെടുക്കുകയും വാഹനങ്ങള് പിടിച്ചെടുക്കുകയും ചെയ്യും. നിയമലംഘകരുടെ ലൈസന്സ് റദ്ദാക്കുമെന്നും അദ്ദേഹം അറിയിച്ചു.
