പാലക്കാട് : പാലക്കാട് ഇടതുപക്ഷ സ്ഥാനാർത്ഥിക്ക് വോട്ട് കുറഞ്ഞത് ജില്ലയിലുടനീളം പ്രകടമായ വോട്ട് വിഹിതത്തിലെ കുറവിന്റെ ഭാഗമാണെന്ന് പി. സരിൻ. താൻ മത്സരിച്ച സമയത്തേക്കാൾ അയ്യായിരത്തോളം വോട്ടുകൾ കുറഞ്ഞു എന്ന കണക്ക് ശരിയല്ലെന്നും ഏകദേശം 3,000-ത്തിൽ ചില്ലുവാനം വോട്ടുകളുടെ കുറവ് മാത്രമേ ഉണ്ടായിട്ടുള്ളൂ എന്നും അദ്ദേഹം വ്യക്തമാക്കി. പാലക്കാട് ജില്ലയിൽ ഇടതുപക്ഷത്തിന്റെ വോട്ടുകളിൽ 5 മുതൽ 8 ശതമാനം വരെ കുറവുണ്ടായിട്ടുണ്ട്. ഇതിന്റെ പ്രതിഫലനമാണ് പാലക്കാട് അസംബ്ലിയിലും കണ്ടത്. തൃശ്ശൂർ ഒഴികെയുള്ള ജില്ലകളിൽ ഇടതുപക്ഷത്തിന്റെ പ്രകടനം ഇത്തരത്തിലായിരുന്നുവെന്നും അദ്ദേഹം ചൂണ്ടിക്കാട്ടി.
കണ്ണാടി, മാത്തൂർ തുടങ്ങിയ ഇടതുപക്ഷ ശക്തികേന്ദ്രങ്ങളിൽ ബിജെപി വോട്ട് പിടിച്ചെന്ന വിലയിരുത്തൽ തെറ്റാണെന്ന് സരിൻ പറഞ്ഞു. മുൻപ് ഇ. ശ്രീധരൻ പിടിച്ച വോട്ടിനേക്കാൾ 1200 വോട്ട് ശോഭ സുരേന്ദ്രന് കുറവാണ് ലഭിച്ചത്. അതിനാൽ ബിജെപി നില മെച്ചപ്പെടുത്തി എന്ന വാദം നിലനിൽക്കില്ലെന്നും അദ്ദേഹം അഭിപ്രായപ്പെട്ടു. പിരായിരി പഞ്ചായത്തിലെ ജനങ്ങൾ എപ്പോഴും യുഡിഎഫിനെ പിന്തുണയ്ക്കുന്ന പാറ്റേൺ ആണ് പിന്തുടരുന്നതെന്നും അത് മാറ്റാനുള്ള ശ്രമം തുടരുമെന്നും സരിൻ വ്യക്തമാക്കി.
