കോഴിക്കോട് : കോഴിക്കോട് പയ്യോളിയിലുണ്ടായ സ്ഫോടനത്തില് അച്ഛനും മകനും പരിക്കേറ്റു. പാഴ്വസ്തുക്കള് കത്തിക്കുന്നതിനിടെയുണ്ടായ സ്ഫോടനത്തിലാണ് ഇരുവര്ക്കും പരിക്കേറ്റത്. കിഴൂര് സ്വദേശിയായ നാരായണന്, മകന് ബിജു എന്നിവര്ക്കാണ് പരിക്കേറ്റത്. ഇവര് കോഴിക്കോട് മെഡിക്കല് കോളേജ് ആശുപത്രിയില് ചികിത്സയിലാണ്.
ഇന്ന് രാവിലെ ഒമ്പത് മണിയോടെയാണ് സംഭവം. അച്ഛനും മകനും ചേര്ന്ന് വീടും പരിസരവും വൃത്തിയാക്കിയശേഷം പാഴ് വസ്തുക്കള് ടാര് വീപ്പയില് നിറച്ചു തീ കൊളുത്തുകയായിരുന്നു. തുടര്ന്ന് അല്പ്പസമയം കഴിഞ്ഞപ്പോള് വീപ്പ പൊട്ടിത്തെറിക്കുകയായിരുന്നു. സമീപത്ത് നില്ക്കുകയായിരുന്ന ഇരുവര്ക്കും സ്ഫോടനത്തില് പരിക്കേറ്റു.
പയ്യോളി പോലീസും ബോംബ് സ്ക്വാഡും സ്ഥലത്തെത്തി പരിശോധന നടത്തി. എന്നാല് സ്ഫോടനകാരണം കണ്ടെത്താനായില്ല. വീപ്പയില് നിറച്ച സാധനങ്ങളില് കരിമരുന്നും ഉള്പ്പെട്ടിരുന്നെന്നാണ് പ്രാഥമിക നിഗമനം. കരിമരുന്ന് അശ്രദ്ധമായി കൈകാര്യം ചെയ്തതിന് ഇരുവര്ക്കും എതിരെ പയ്യോളി പോലീസ് കേസെടുത്തിട്ടുണ്ട്.
