എറണാകുളം : ചക്കരപ്പറമ്പിൽ ലോറിയുടെ പിന്നിൽ ബസ് ഇടിച്ച് അപകടം. തമിഴ്നാട്ടിൽ നിന്നും പാലക്കാട് വഴി എറണാകുളത്തേക്ക് വരികയായിരുന്ന ബസ്സാണ് അപകടത്തിൽപ്പെട്ടത്. മുന്നിൽ പോവുകയായിരുന്ന ലോറിയുടെ പിന്നിലേക്ക് ബസ് ഇടിച്ചുകയറുകയായിരുന്നുവെന്ന് ദൃക്സാക്ഷികൾ പറയുന്നു.
അപകടത്തെത്തുടർന്ന് ചക്കരപ്പറമ്പ് ഭാഗത്ത് കടുത്ത ഗതാഗതക്കുരുക്ക് അനുഭവപ്പെടുകയാണ്. അപകടം നടന്ന് ഒരു മണിക്കൂറോളം കഴിഞ്ഞിട്ടും ബസ് റോഡിന് നടുവിൽ തന്നെ കിടക്കുന്നതാണ് കുരുക്ക് രൂക്ഷമാകാൻ കാരണം. പാലാരിവട്ടം മുതൽ വൈറ്റില വരെയുള്ള ദേശീയപാതയിൽ വലിയ രീതിയിലുള്ള വാഹനത്തിരക്ക് അനുഭവപ്പെടുന്ന സമയത്താണ് ഈ അപകടം സംഭവിച്ചിരിക്കുന്നത്.
സ്വകാര്യ ബസുകൾ ഉൾപ്പെടെയുള്ള മറ്റ് വാഹനങ്ങൾക്ക് കടന്നുപോകാൻ വലിയ ബുദ്ധിമുട്ടാണ് നിലവിൽ നേരിടുന്നത്. അപകടത്തിൽ ആർക്കും പരിക്കില്ല എന്നത് ആശ്വാസകരമായ കാര്യമാണ്. അപകടം നടന്ന് ഏറെ നേരമായിട്ടും ബസ് റോഡിൽ നിന്ന് മാറ്റാനുള്ള നടപടികൾ തുടങ്ങിയിട്ടില്ലെന്നും പോലീസോ മറ്റ് അധികൃതരോ സ്ഥലത്തെത്തിയിട്ടില്ലെന്നും നാട്ടുകാർ പറയുന്നു.
