ഇടുക്കി : ജില്ലയിൽ നിന്ന് കോൺഗ്രസിന് മന്ത്രിസ്ഥാനം വേണമെന്ന ശക്തമായ ആവശ്യവുമായി ഡിസിസി പ്രസിഡന്റ് സി.പി. മാത്യു രംഗത്ത് . കേരള കോൺഗ്രസ് നേതാവ് അപ്പു ജോൺ ജോസഫിനായി മന്ത്രിസ്ഥാനം ലഭിക്കാനുള്ള നീക്കങ്ങൾ സജീവമാകുന്നതിനിടയിലാണ് ഇടുക്കി ഡിസിസിയുടെ ഈ പുതിയ അവകാശവാദം. 1972-ൽ ജില്ല രൂപീകരിച്ചതിനുശേഷം ഇന്നുവരെ ഇടുക്കിയിൽ നിന്ന് ഒരു കോൺഗ്രസ് മന്ത്രി പോലും ഉണ്ടായിട്ടില്ലെന്ന് ഡിസിസി പ്രസിഡന്റ് ചൂണ്ടിക്കാട്ടുന്നു. വയനാട്, പത്തനംതിട്ട തുടങ്ങിയ ചെറിയ ജില്ലകളിൽ നിന്ന് പോലും കോൺഗ്രസ് പ്രതിനിധികൾ മന്ത്രിസഭയിൽ എത്തിയപ്പോൾ ഇടുക്കി അവഗണിക്കപ്പെട്ടുവെന്നാണ് പരാതി.
ഇത്തവണ കൈപ്പത്തി ചിഹ്നത്തിൽ മത്സരിച്ച നാല് എംഎൽഎമാരെ വിജയിപ്പിക്കാൻ സാധിച്ചതാണ് കോൺഗ്രസിന്റെ ആത്മവിശ്വാസം വർധിപ്പിക്കുന്നത്. യുഡിഎഫ് തരംഗം ആഞ്ഞടിച്ച ഈ ഘട്ടത്തിൽ അർഹമായ പരിഗണന വേണമെന്നാണ് പാർട്ടിയുടെ നിലപാട്. കോൺഗ്രസിന് മന്ത്രിസ്ഥാനം ലഭിക്കുകയാണെങ്കിൽ കെപിസിസി വൈസ് പ്രസിഡന്റ് റോയ് കെ. പൗലോസിനാകും നറുക്ക് വീഴുക. എന്നാൽ, കേരള കോൺഗ്രസിന്റെ അപ്പു ജോൺ ജോസഫും മന്ത്രിസ്ഥാനത്തിനായി സജീവമായി രംഗത്തുണ്ട്.
