കോട്ടയം : ഇന്ധന വില വര്ധനയുടെ പേരില് ബസ് യാത്രക്കൂലി കൂട്ടുന്നത് സര്ക്കാര്, സ്വകാര്യ ബസ് സര്വിസുകള്ക്ക് തിരിച്ചടിയായേക്കും. ബൈക്ക് യാത്രക്ക് ബസ് യാത്രയെക്കാള് ചെലവ് കുറഞ്ഞ സാഹചര്യത്തില് പൊതുഗതാഗത സംവിധാനത്തെ കൂടുതല് പ്രതിസന്ധിയിലാക്കാന് മാത്രമെ നിരക്കുവര്ധന ഉപകരിക്കൂവെന്നാണ് വിദഗ്ധരുടെ അഭിപ്രായം. നിലവില് ബസില് 2.5 കിലോമീറ്റര് യാത്ര ചെയ്യാന് എട്ടു രൂപ നല്കണം. ഒരു ലിറ്റര് പെട്രോളിന് 60 കിലോമീറ്റര് ഇന്ധനക്ഷമതയുള്ള ബൈക്കില് ഈ ദൂരം സഞ്ചരിക്കാന് 4.3 രൂപയെ ചെലവാകൂ. രണ്ടുപേരുണ്ടെങ്കില് ഇതിന്റെ പകുതി തുകയില് ലക്ഷ്യത്തിലെത്താം. അഞ്ചു കിലോമീറ്റര് പോകാന് ബസില് 10 രൂപ മുടക്കണം. രണ്ടുപേര്ക്ക് 20 രൂപ ചെലവാകുമ്പോള് ബൈക്കില് രണ്ടുപേര്ക്ക് പരമാവധി ഒമ്പതു രൂപ മുടക്കിയാല് മതിയാകും. ബസ് നിരക്ക് കൂട്ടിയാല് കൂടുതല് പേര് സ്വകാര്യ വാഹനങ്ങളിലേക്ക് മാറും. സെക്കന്ഡ്ഹാന്ഡ് ഇരുചക്ര വാഹന വില്പനയിലുണ്ടായിരിക്കുന്ന വര്ധന ഈ സൂചനയാണ് നല്കുന്നത്.
സ്വകാര്യ ബസുകളുടെ പ്രവര്ത്തന ചെലവ് സംബന്ധിച്ച് പഠനം നടത്തുന്ന നാറ്റ്പാക്കിന്റെ 2021 ജൂലൈയിലെ പിസ്കോ സൂചിക പ്രകാരം ഒരു കിലോമീറ്റര് സര്വിസ് നടത്താന് 52.56 രൂപയാണ് ചെലവ്. ഡീസല് – 27.56 രൂപ, ടയര്, സ്പെയര്പാര്ട്സ് തുടങ്ങിയവ – 4.58 രൂപ, അറ്റകുറ്റപ്പണിക്കുള്ള കൂലി – 2.33 രൂപ, ശമ്പളം – 12.84 രൂപ, തേയ്മാനം – 1.41 രൂപ, നികുതികള് 1.36 രൂപ, പലിശ – 92 പൈസ, ഇന്ഷുറന്സ് - 95 പൈസ, മറ്റു ചെലവുകള് – 56 പൈസ, പ്രവര്ത്തന മൂലധനം – നാലു പൈസ എന്നിങ്ങനെയാണ് നടത്തിപ്പ് ചെലവ്.
ഇതനുസരിച്ച് മൊത്തം ചെലവിന്റെ 52 ശതമാനം ഡീസലിനാണ്. ഒരു ലിറ്റര് ഡീസലിന് 94.74 രൂപയുണ്ടായിരുന്നപ്പോള് തയാറാക്കിയ കണക്കാണിത്. 39.90 രൂപ അടിസ്ഥാന വിലയുള്ള ഡീസലിന് 31.80 രൂപ കേന്ദ്ര നികുതിയും 20.12 രൂപ സംസ്ഥാന നികുതിയും 2.59 രൂപ ഡീലര് കമീഷനും 33 പൈസ കടത്തുകൂലിയും ചേരുമ്പോഴാണ് 94.74 രൂപയിലെത്തുന്നത്.
ഇതില് സംസ്ഥാന സര്ക്കാര് ചുമത്തുന്ന ഇന്ധന നികുതിയും വാഹനനികുതിയും ഒഴിവാക്കിയാല് കിലോമീറ്ററിന് 10.83 രൂപ വീതം പ്രവര്ത്തന ചെലവ് കുറക്കാനാകും. ഒരു കിലോമീറ്റര് സര്വിസ് നടത്താന് 52.56 രൂപ എന്നത് 41.73 രൂപയായി താഴും. ഇതോടെ കോവിഡ് കാലത്തിനു മുമ്പുള്ളതിനേക്കാള് കുറഞ്ഞ നിരക്കില് ലാഭകരമായി ബസ് സര്വിസ് നടത്താനാവും. കുറഞ്ഞ ശമ്പളത്തിന് ജോലി ചെയ്യുന്ന ലക്ഷക്കണക്കിന് യാത്രക്കാര്ക്കും ഇത് ആശ്വാസം നല്കും.
