കോന്നി : സംസ്ഥാന പാതയിൽ കോന്നിയിൽ സർവീസ് നടത്തുന്ന കെ എസ് ആർ റ്റി സി യും സ്വകാര്യ ബസുളും റോഡിനു നടുവിൽ ബസ് നിർത്തി യാത്രക്കാരെ കയറ്റി ഇറക്കുന്നത് അപകടങ്ങൾക്ക് കാരണമാകുന്നു. പ്രധാനമായും കോന്നി കെ എസ് ആർ റ്റി സി ഓപ്പറേറ്റിംഗ് സ്റ്റേഷന് മുൻപിലും കോന്നി മാർക്കറ്റ് ജംഗ്ഷനിലും ആണ് ബസുകൾക്ക് സ്റ്റോപ്പ് അനുവദിച്ചിട്ടുള്ളത്. എന്നാൽ മറ്റ് വാഹനങ്ങൾക്ക് ബുദ്ധിമുട്ട് ഉണ്ടാക്കാത്ത തരത്തിൽ റോഡിൽ നിന്ന് ഇറക്കി ഇടത് ഭാഗത്ത് നിർത്തേണ്ട ബസുകൾ റോഡിനു നടുവിലും ആളുകൾ റോഡ് മുറിച്ചു കടക്കുന്ന വരകളുടെ നടുവിലും കൊണ്ടുവന്ന് നിർത്തിയിടുന്നതും ആളുകളെ കയറ്റി ഇറക്കുന്നതും കോന്നിയിൽ സ്ഥിരം കാഴ്ചയാണ്.
വേഗത്തിൽ വരുന്ന ബസുകൾ റോഡിനു നടുവിൽ പെട്ടന്ന് ബ്രേക്ക് ചെയ്യുമ്പോൾ പുറകെ വരുന്ന വാഹനങ്ങൾ ഇടിച്ച് അപകടങ്ങൾ ഉണ്ടാകുന്നതിനുള്ള സാധ്യതയും ഏറെയാണ്. പുലർച്ചെ കോന്നി ട്രാഫിക് ജംഗ്ഷനിൽ ബസ് നിർത്തി ആളുകളെ കയറ്റി ഇറക്കുന്നതും പതിവായി മാറിയിട്ടുണ്ട്. പോലീസ് സ്ഥാപിച്ച നോ പാർക്കിംഗ് ബോർഡിന് സമീപത്തു തന്നെയാണ് ഇത്തരത്തിൽ ബസുകൾ നിർത്തിയിടുന്നത്. തുടർച്ചയായി അപകടങ്ങൾ നടക്കുന്ന കോന്നി സംസ്ഥാനപാതയിൽ ഇത്തരത്തിൽ ബസുകൾ അലക്ഷ്യമായി നിർത്തിയിടുന്നതിന് എതിരെ അധികൃതർ കർശന നടപടികൾ സ്വീകരിക്കേണ്ടത് ആവശ്യമാണ്.
