മല്ലപ്പള്ളി : താലൂക്കിന്റെ കിഴക്കൻ പ്രദേശങ്ങളിൽ നിന്നും പത്തനംതിട്ട ജില്ലാ ആസ്ഥാനത്തേക്ക് ബസ് സര്വീസുകള് ഇല്ലാത്തത് ജനങ്ങളെ ദുരിതത്തിലാക്കുന്നു. വിവിധ ആവശ്യങ്ങള്ക്കായി മല്ലപ്പള്ളി താലൂക്കിലെ വായ്പ്പൂര്, കോട്ടാങ്ങൽ, ചുങ്കപ്പാറ എന്നീ പ്രദേശങ്ങളിൽ നിന്നും ജില്ലാ ആസ്ഥാനമായ പത്തനംതിട്ടയിൽ എത്തേണ്ടവർ അനുഭവിക്കുന്നത് വലിയ യാത്രാ ദുരിതമാണ്. ജില്ലാ ആസ്ഥാനത്ത് പ്രവര്ത്തിക്കുന്ന വിവിധ സര്ക്കാര് സ്ഥാപനങ്ങളില് വിവിധ ആവശ്യങ്ങൾക്ക് എത്തണമെങ്കിൽ നിരവധി ബസുകൾ കയറിയിറങ്ങി ഏറെ ദൂരം സഞ്ചരിക്കേണ്ട ഗതികേടിലാണ്. പത്തനംതിട്ട ജനറല് ആശുപത്രിയിലേക്ക് എത്തുന്ന രോഗികളാണ് ഇപ്പോള് ഏറെയും ബുദ്ധിമുട്ടിലായിരിക്കുന്നത്. ബസുകള് മാറിക്കയറി എത്തുമ്പോഴേക്കും ആശുപത്രി സമയം കഴിഞ്ഞു പോകുന്നതായും ഇവര് പറയുന്നു.
കെ.എസ്.ആർ.ടി.സി മല്ലപ്പള്ളി ഡിപ്പോയിൽ നിന്നുള്ള സർവീസുകൾ ചുങ്കപ്പാറയിൽ അവസാനിപ്പിക്കുകയാണ് ഇപ്പോള് ചെയ്യുന്നത്. ഇത് കഴിഞ്ഞുള്ള ആളുകള് മറ്റ് വിവിധ വാഹനങ്ങളെ ആശ്രയിച്ചാല് മാത്രമേ ഉദ്ദേശിക്കുന്ന സ്ഥലത്ത് എത്തിച്ചേരുവാന് സാധിക്കുകയുള്ളു. നിരവധി സ്വകാര്യ ബസുകൾക്ക് അടുത്തിടെ പുതിയ പെർമിറ്റ് അനുവദിച്ചെങ്കിലും ഈ റൂട്ടുകളിലേക്ക് മാത്രം ഒരു പെര്മിറ്റും അനുവദിക്കപ്പെട്ടില്ല. മല്ലപ്പള്ളി, റാന്നി കെ.എസ്.ആര്.ടി.സി ഡിപ്പോകളിൽ നിന്നും മല്ലപ്പള്ളി, വായ്പ്പൂര്, കോട്ടാങ്ങൽ, ചുങ്കപ്പാറ, പൊന്തൻപുഴ, റാന്നി വഴി പത്തനംതിട്ടയ്ക്ക് പുതിയ കെ.എസ്.ആര്.റ്റി.സി ബസ് സർവീസ് ആരംഭിക്കണമെന്നാണ് നാട്ടുകാരുടെയും യാത്രക്കാരുടെയും ആവശ്യം. ജനപ്രതിനിധികളുടെ ഭാഗത്ത് നിന്നും ഈ വിഷയത്തില് ആവശ്യമായ നടപടികള് ഒന്നും തന്നെ ഉണ്ടാകുന്നില്ല എന്നും ജനങ്ങള്ക്ക് പരാതിയുണ്ട്.
