കൊട്ടാരക്കര : കോട്ടാത്തല ബേക്കറി ജംഗ്ഷനില് വീട്ട് മുറ്റത്തെ പോര്ച്ചില് നിര്ത്തിയിട്ട കാര് തനിയെ നിരങ്ങി നീങ്ങി അയല്പക്കത്തെ പത്തടി താഴ്ചയുള്ള വീട്ട് മുറ്റത്തേക്ക് മറിഞ്ഞു. പുത്തൂര് ശാസ്താംകോട്ട റോഡില് ഞായറാഴ്ചയാണ് അപകടം.
എസ്.എസ് ലാന്ഡില് റിട്ട. ടീച്ചര് സീനയുടെ വീട്ടിലുണ്ടായിരുന്ന കാറാണ് ഇവരുടെ അയല്വാസിയായ തേവന്റഴികത്ത് പൊന്നമ്മയുടെ വീട്ട് മുറ്റത്തേക്ക് മറിഞ്ഞത്.
സീനയുടെ കാര് പോര്ച്ചില് നിന്നും നിരങ്ങി നീങ്ങിയ കാര് റോഡ് ക്രോസ് ചെയ്ത് മറുവശത്തെ വീടിന്റെ മുറ്റത്തേക്ക് മറിയുകയായിരുന്നു. കാര് റോഡ് ക്രോസ് ചെയ്യുന്ന സമയം അതുവഴി മറ്റ് വാഹനങ്ങള് കടന്നു വരാഞ്ഞതും പൊന്നമ്മയുടെ വീട്ടുമുറ്റത്ത് ആളില്ലാഞ്ഞതും വന് അപകടം ഒഴിവാക്കി. പുത്തൂര് പോലീസ് കേസെടുത്തു.
