കൊച്ചി : ഒമിക്രോണ് രോഗം സ്ഥിരീകരിച്ച മുപ്പത്തിയൊന്പതുകാരനൊപ്പം വിമാനത്തില് യാത്ര ചെയ്ത ആറ് പേരുടെ പരിശോധന ഇന്ന് നടക്കും. രോഗ ബാധിതന് യാത്ര ചെയ്ത ടാക്സിയുടെ ഡ്രൈവറും നിരീക്ഷണത്തിലാണ്. ഡിസംബര് ആറിന് ബ്രിട്ടനില് നിന്ന് ഭാര്യയോടൊപ്പം നെടുമ്പാശേരി വിമാനത്താവളത്തിലെത്തിയ തൃക്കാക്കര സ്വദേശിയ്ക്കാണ് ഇന്നലെ ഒമിക്രോണ് സ്ഥിരീകരിച്ചത്. അബുദാബി വഴി എത്തിഹാദ് ഇ വൈ 280 വിമാനത്തിലാണ് ഇയാള് നെടുമ്പാശേരിയിലിറങ്ങിയത്.
വിമാനത്തിലുണ്ടായിരുന്ന എല്ലാവര്ക്കും ജാഗ്രതാ നിര്ദേശം നല്കിയിട്ടുണ്ട്. കൊവിഡ് സ്ഥിരീകരിച്ചതിനെ തുടര്ന്ന് ഇയാളുടെ അമ്മയെയും ഭാര്യയെയും ഭാര്യാമാതാവിനെയും സര്ക്കാര് ആശുപത്രിയിലേക്ക് മാറ്റിയിട്ടുണ്ട്. ഇവരുടെ സാമ്പിള് ജനിതക പരിശോധനയ്ക്ക് അയച്ചു. രോഗിയുടെ കുടുംബത്തിലെ മൂന്നുപേരെയും സുരക്ഷിതമായി ക്വാറന്റൈനില് ആക്കിയിട്ടുണ്ടെന്നും എല്ലാവരുടെയും ആരോഗ്യനില തൃപ്തികരമാണെന്നും ആരോഗ്യമന്ത്രി വീണ ജോര്ജ് അറിയിച്ചു.
