തിരുവനന്തപുരം : വെഞ്ഞാറമൂട്ടിൽ കാറും ബൈക്കും കൂട്ടിയിടിച്ച് 18 വയസ്സുകാരൻ മരിച്ചു. കൊല്ലം കടക്കൽ സ്വദേശിയായ സുബിനാണ് അപകടത്തിൽ മരിച്ചത്. എംസി റോഡിൽ വെഞ്ഞാറമൂട് കീഴായിക്കുണത്ത് വെച്ച് ഇന്ന് പുലർച്ചയോടെയാണ് അപകടം നടന്നത്. വെഞ്ഞാറമൂട് ഭാഗത്ത് നിന്ന് വരികയായിരുന്ന ബൈക്കും എതിർദിശയിൽ വന്ന കാറും തമ്മിൽ കൂട്ടിയിടിക്കുകയായിരുന്നു. ഒരു സ്വകാര്യ ആശുപത്രിയിലെ ഡോക്ടർമാർ സഞ്ചരിച്ചിരുന്ന കാറാണ് ബൈക്കുമായി ഇടിച്ചത്. ഇടിയുടെ ആഘാതത്തിൽ ബൈക്കിന് പിന്നിലിരുന്ന സുബിൻ തെറിച്ചു വീഴുകയായിരുന്നു. അപകടത്തിൽ ബൈക്ക് ഓടിച്ചിരുന്ന ആൾക്കും പരിക്കേറ്റിട്ടുണ്ട്, എന്നാൽ ഇദ്ദേഹത്തിന്റെ പരിക്ക് ഗുരുതരമല്ലെന്നാണ് ലഭിക്കുന്ന വിവരം.
ഉടൻ തന്നെ ഫയർഫോഴ്സും നാട്ടുകാരും ചേർന്ന് ഇവരെ ആശുപത്രിയിൽ എത്തിച്ചെങ്കിലും സുബിന്റെ ജീവൻ രക്ഷിക്കാനായില്ല. നിലവിൽ സുബിന്റെ മൃതദേഹം ആശുപത്രിയിൽ സൂക്ഷിച്ചിരിക്കുകയാണ്. പോസ്റ്റ്മോർട്ടം നടപടികൾ പൂർത്തിയാക്കിയ ശേഷം മൃതദേഹം ബന്ധുക്കൾക്ക് വിട്ടുനൽകുമെന്ന് പോലീസും കുടുംബവും അറിയിച്ചു.
