ഡല്ഹി: കോണ്ഗ്രസ് നേതാക്കളായ രാഹുല് ഗാന്ധി , സുപ്രിയ ശ്രീനേറ്റ് , ജയറാം രമേഷ് എന്നിവര്ക്കെതിരെ ബെംഗളൂരു ആസ്ഥാനമായുള്ള മ്യൂസിക് കമ്പനിയായ എംആര്ടി മ്യൂസിക് പകര്പ്പവകാശ ലംഘനത്തിന് കേസ് കൊടുത്തു. തെന്നിന്ത്യന് സൂപ്പര് ഹിറ്റ് ചിത്രമായ കെജിഎഫ് 2 ന്റെ ഹിന്ദി ഗാനങ്ങളുടെ അവകാശം സ്വന്തമാക്കാന് വന് തുക മുടക്കിയതായി സംഗീത കമ്പനി പരാതിയില് പറയുന്നു. കോണ്ഗ്രസ് അനുവാദം വാങ്ങാതെ സിനിമയില് നിന്ന് ഗാനങ്ങള് എടുക്കുകയും രാഹുല് ഗാന്ധി നയിക്കുന്ന ഭാരത് ജോഡോ യാത്രയുടെ മാര്ക്കറ്റിംഗ് വീഡിയോകള് സൃഷ്ടിക്കാന് അവ ഉപയോഗിക്കുകയും ചെയ്തുവെന്ന് എംആര്ടി മ്യൂസിക് പരാതിയില് ആരോപിക്കുന്നു. മൂന്ന് കോണ്ഗ്രസ് നേതാക്കള്ക്കുമെതിരെ സെക്ഷന് 403, 465, 120 എന്നീ വകുപ്പുകള് പ്രകാരം എഫ്ഐആര് രജിസ്റ്റര് ചെയ്തു.
