പത്തനംതിട്ട : മല്ലപ്പളളി കോട്ടാങ്ങലില് സ്കൂളിലേക്ക് പോയ വിദ്യാര്ത്ഥികളെ തടഞ്ഞു നിര്ത്തി ഭീഷണിപ്പെടുത്തി ഞാന് ബാബരി എന്ന് ബാഡ്ജ് ധരിപ്പിച്ച സംഭവത്തില് പോലീസ് കേസെടുത്തു. ഒന്നാം പ്രതി ചുങ്കപ്പാറ സ്വദേശി മുനീര് ഇബ്നു നസീര്, ബാക്കി കണ്ടാലറിയാവുന്ന 2 പേരെയാണ് പ്രതിചേര്ത്തിരിക്കുന്നത്. പ്രതികള്ക്കെതിരെ 341, 153 (എ), 34 വകുപ്പുകളാണ് ചുമത്തിയിരിക്കുന്നത്.
മതസ്പര്ദ്ധ വളര്ത്താനും സാമുദായിക ലഹള സൃഷ്ടിക്കാനും പ്രതികള് നീക്കം നടത്തിയെന്ന് എഫ്ഐആറില് പറയുന്നു. സമൂഹത്തില് അരാജകത്വം സൃഷ്ടിക്കാനായിരുന്നു പ്രതികളുടെ നീക്കമെന്നും പോലീസ് പറയുന്നു. സംഭവത്തില് പ്രതിഷേധം ശക്തമായതോടെയാണ് മൂന്ന് എസ്ഡിപിഐ പ്രവര്ത്തകര്ക്കെതിരെ കേസ് എടുത്തത്. ബിജെപി റാന്നി മണ്ഡലം വൈസ് പ്രസിഡന്റ് സുരേഷ് കെ പിള്ളയുടെ പരാതിയിലാണ് കേസ്.
ബാഡ്ജ് ധരിപ്പിക്കുന്ന ഒരാളുടെ മുഖവും ചിത്രങ്ങളില് വ്യക്തമായിരുന്നു. ഇതിന്റെ അടിസ്ഥാനത്തിലാണ് പോലീസ് കേസെടുത്തത്. സംഭവത്തില് ദേശീയ ബാലാവകാശ കമ്മീഷന് ജില്ലാ പോലീസ് മേധാവിയോട് റിപ്പോര്ട്ട് തേടിയിരുന്നു. പെരുമ്പട്ടി പോലീസ് ആണ് കേസെടുത്തത്. ഇന്ന് രാവിലെയാണ് കോട്ടാങ്ങല് സെന്റ് ജോര്ജ്ജ് സ്കൂളിലേക്ക് പോയ വിദ്യാര്ത്ഥികളുടെ നെഞ്ചില് ഞാന് ബാബരി എന്നെഴുതിയ ബാഡ്ജ് ഭീഷണിപ്പെടുത്തി ധരിപ്പിച്ചത്. സംഭവത്തിന്റെ ചിത്രങ്ങള് പ്രചരിച്ചതോടെ വ്യാപക പ്രതിഷേധവും ഉയര്ന്നിരുന്നു.
