പുനലൂര് : വീട്ടമ്മയുടെ കഴുത്തില് നിന്ന് മാല പൊട്ടിച്ച് കടന്ന തമിഴ്നാട് സ്വദേശിയെ തെന്മല പൊലീസ് അറസ്റ്റ് ചെയ്തു. നാഗര്കോവില് സ്വദേശി മാലമണിയെന്ന മൂര്ത്തിയെ(21)യാണ് തെന്മല സി.ഐ കെ.ശ്യാം, എസ്.ഐ.സുബിന് തങ്കച്ചന് തുടങ്ങിയവരുടെ നേതൃത്വത്തിലുളള പോലീസ് ഇടപ്പാളയത്ത് നിന്ന് പിടി കൂടിയത്.
ഇന്നലെ രാവിലെ 10മണിയോടെ ഉറുകുന്ന് കനാല് പുറമ്പോക്ക് സ്വദേശിനിയായ വിജയമ്മ ആടിന് തീറ്റകൊടുത്തുകൊണ്ട് നില്ക്കുമ്പോഴാണ് ബൈക്കിലെത്തിയ യുവാവ് പുഷ്പവല്ലിയെന്ന സ്ത്രീയുടെ പുരയിടം എവിടെയാണെന്ന് തിരക്കിയ ശേഷം മാല പൊട്ടിച്ചത്. തുടര്ന്ന് യുവാവ് സ്ഥലം വിട്ടു. തെന്മല പോലീസില് വിവരം അറിയിച്ചതിനെ തുടര്ന്ന് പ്രദേശത്തെ സി.സി.ടി.വി ക്യാമറകള് പരിശോധിച്ച ശേഷം ഇടപ്പാളയത്തു നിന്ന് പ്രതിയെ പിടികൂടി. വൈകിട്ട് കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
