ദില്ലി: ചന്ദ്രനെ തൊടാനുള്ള യാത്രയില് ഒരു ഘട്ടം കൂടി മുന്നേറി ചന്ദ്രയാന് 3. മൂന്നാംഘട്ട ഭ്രമണപഥമുയര്ത്തല് ഇന്ന് ഉച്ചയ്ക്ക് വിജയകരമായി പൂര്ത്തിയാക്കിയതായി ഐഎസ്ആര്ഒ അറിയിച്ചു. ഭൂമിയുടെ ആകര്ഷണത്തിലുള്ള ഭ്രമണപഥത്തില്നിന്ന് അഞ്ച് ഘട്ടമായി ഉയര്ത്തി പേടകത്തെ ചാന്ദ്ര ഭ്രമണപഥത്തിലേക്ക് മാറ്റുകയാണ് ഐഎസ്ആര്ഒയുടെ പദ്ധതി. ഇതില് മൂന്നാമത്തേതാണ് ഇന്ന് പൂര്ത്തിയായത്. നാലാമത്തേത് 20ന് ഉച്ചയ്ക്ക് രണ്ടിനും മൂന്നിനുമിടയിലും അഞ്ചാമത്തേത് 21നും നടക്കും.
അതേസമയം, ഭൂമിയില്നിന്ന് എത്ര അകലത്തിലുള്ള ഭ്രമണപഥത്തിലേക്കാണ് പേടകത്തെ ഇന്ന് മാറ്റിയതെന്ന് ഐഎസ്ആര്ഒ വ്യക്തമാക്കിയിട്ടില്ല. എന്നാല് മൂന്നാംഘട്ട ഭ്രമണപഥമുയര്ത്തല് പ്രക്രിയ ആസൂത്രണം ചെയ്തതുപോലെ കൃത്യമായി നടന്നതായി ഐഎസ്ആര്ഒ ട്വിറ്ററില് കുറിച്ചു. കഴിഞ്ഞദിവസം നടന്ന രണ്ടാംഘട്ട ഉയര്ത്തലില് ഭൂമിക്ക് അടുത്ത ദൂരം 226 കിലോ മീറ്ററും അകലെയുള്ള ദൂരം 41,603 കിലോമീറ്ററും ആയ ദീര്ഘ വൃത്താകൃതിയിലുള്ള പാതയിലേക്കാണ് പേടകത്തെ മാറ്റിയത്. ജൂലൈ 14നായിരുന്നു ചാന്ദ്രയാന് 3ന്റെ വിക്ഷേപണം.
