ചങ്ങനാശ്ശേരി : വികസന സദസ്സിന്റെ ഭാഗമായി വിജ്ഞാന കേരളം പദ്ധതിയിൽ ഉൾപ്പെടുത്തി ചങ്ങനാശ്ശേരി നഗരസഭ, കുടുംബശ്രീ ജില്ലാമിഷൻ, ജി ടെക് എന്നിവരുമായി സഹകരിച്ചു നടത്തുന്ന തൊഴിൽമേള ഇന്ന് രാവിലെ ചങ്ങനാശ്ശേരി നഗരസഭാ ടൗൺ ഹാളിൽ നടക്കും. നഗരസഭാ വൈസ് ചെയർമാൻ മാത്യൂസ് ജോർജിന്റെ അധ്യക്ഷതയിൽ നഗരസഭാ ചെയർപേഴ്സൻ കൃഷ്ണകുമാരി രാജാശേഖരൻ മേളയുടെ ഉദ്ഘാടനം നിര്വഹിക്കും. നഗരസഭാ സ്റ്റാൻഡിങ് കമ്മിറ്റി ചെയർ പേഴ്സന്മാർ, കൗൺസിലർമാർ, ജീവനക്കാർ എന്നിവർ പങ്കെടുക്കും.
അക്കൗണ്ടിംഗ്, കൗൺസിലിംഗ്, ടെലികോളർ, സോഫ്റ്റ്വെയർ ഫാക്കൽറ്റി, മൾട്ടി മീഡിയ ഫാക്കൽറ്റി, ഹാർഡ് വെയർ ടെക്നീഷ്യൻ, റിലേഷൻഷിപ്പ് മാനേജർ, സൂപ്പർവൈസർ, എച്ച് ആർ അസിസ്റ്റന്റ്, ഓട്ടോ മൊബൈൽ ടെക്നിഷ്യൻ, ഐ.ടി., ഓഫീസ്, ബാങ്ക്, ആരോഗ്യം, കൺസ്ട്രക്ഷൻ തുടങ്ങിയ വിവിധ മേഖലകളിൽ നിന്നുള്ള 25ലധികം തൊഴിൽദാതാക്കൾ മേളയില് പങ്കെടുക്കും. 250ലധികം ഒഴിവുകളാണ് റിപ്പോര്ട്ട് ചെയ്തിട്ടുള്ളത്. രാവിലെ 8.30 മുതൽ രജിസ്ട്രേഷൻ ഉണ്ടായിരിക്കുന്നതാണ്. ഓൺലൈൻ രജിസ്ട്രേഷൻ ചെയ്തിട്ടുള്ളവരും രജിസ്ട്രേഷൻ കൗണ്ടറിൽ നിന്നും അഡ്മിറ്റ് കാർഡ് കൈപ്പറ്റേണ്ടതാണെന്ന് ചങ്ങനാശ്ശേരി നഗരസഭാ സെക്രട്ടറി അറിയിച്ചു.
