കോന്നി : സംസ്ഥാന സർക്കാർ പൊതു വിദ്യാഭ്യാസ വകുപ്പ് ഹയർ സെക്കണ്ടറി വിഭാഗം നാഷണൽ സർവീസ് സ്കീമിന്റെ നേതൃത്വത്തിൽ കലോത്സവ നഗരിയിൽ സംഘടിപ്പിച്ച “ചായം 2022” പ്രദർശന വിപണന മേള ശ്രദ്ധേയമായി. പരിപാടിയുടെ ഭാഗമായി ലഹരി വിരുദ്ധ പോസ്റ്റർ പ്രദർശനം,ഫ്രീഡം വാൾ പ്രദർശനം തുടങ്ങിയവയാണ് സംഘടിപ്പിച്ചത്. ജില്ലയിലെ 61 എൻ എസ് എസ് യൂണിറ്റുകളിൽ നിന്നായി ഒന്നര ആഴ്ച്ച കൊണ്ട് എത്തിച്ച വസ്തുക്കൾ ആയിരുന്നു വിപണനമേളയിൽ എത്തിച്ചത്.
വിദ്യാർഥികൾ തന്നെ തയ്യാറാക്കിയ ബോട്ടിൽ ആർട്ട്, കയർ ഉത്പന്നങ്ങൾ, പേപ്പർ ഉത്പന്നങ്ങൾ, ചകിരി ഉത്പന്നങ്ങൾ, സ്ട്രോ ഉപയോഗിച്ചുള്ള വീട് തുടങ്ങി നിരവധി കരകൗശല വസ്തുക്കൾ ആണ് മേളയിൽ അണി നിരത്തിയത്.സ്വാതന്ത്ര്യ സമര സേനാനികളുടെ ചിത്രം ആലേഖനം ചെയ്ത ഫ്രീഡം വാൾ പ്രദർശനത്തിൽ ശ്രദ്ദേയമായി. കരകൗശല വസ്തുക്കൾ വിട്ടുകിട്ടുന്ന പണം സാമൂഹിക സേവന പ്രവർത്തനങ്ങൾക്ക് വിനിയോഗിക്കും എന്നും ആദ്യ ദിവസം തന്നെ നിരവധി ആളുകൾ സ്റ്റാൾ സന്ദർശിക്കുന്നുണ്ടെന്നും വിദ്യാർഥികൾ പറഞ്ഞു.ജില്ലാ പഞ്ചായത്ത് വിദ്യാഭ്യാസ സ്റ്റാൻഡിങ് കമ്മറ്റി ചെയർമാൻ ആർ ആജയകുമാർ ആണ് ചായം 2022 ഉദ്ഘാടനം ചെയ്തത്.