ഗുവാഹത്തി: അസമില് ബി.ജെ.പി സര്ക്കാരിന് തിരിച്ചടിയായി സംസ്ഥാന ചലച്ചിത്ര അവാര്ഡ് ജേതാക്കള്ക്ക് നല്കിയ ചെക്കുകള് മടങ്ങി. തിങ്കളാഴ്ചയാണ് അവാര്ഡുകള് വിതരണം ചെയ്തത്. വെള്ളിയാഴ്ച എട്ട് അവാര്ഡ് ജേതാക്കള് ബാങ്കിലെത്തിയപ്പോഴാണ് ചെക്ക് മടങ്ങിയ കാര്യം അറിയുന്നത്. ഗായിക നഹിദ് അഫ്രിന് പാടാത്ത ഗാനത്തിന് മികച്ച പിന്നണി ഗായികയായി തിരഞ്ഞെടുക്കപ്പെട്ടതിനെ തുടര്ന്ന് വിവാദങ്ങളില് അകപ്പെട്ട എട്ടാമത് അസം സംസ്ഥാന ചലച്ചിത്ര അവാര്ഡ് ദാന ചടങ്ങ് ചെക്ക് വിവാദത്തിലും കുടുങ്ങിയിരിക്കുകയാണ്.
അമൃത് പ്രീതം (സൗണ്ട് ഡിസൈന്), ദേബജിത് ചാങ്മൈ (സൗണ്ട് മിക്സിംഗ്), പ്രഞ്ജല് ദേക (സംവിധാനം), ദേബജിത് ഗയാന് (സൗണ്ട് ഡിസൈനും മിക്സിംഗും), ബെഞ്ചമിന് ഡൈമറി (അഭിനയം) തുടങ്ങിയ പ്രമുഖ സിനിമാ താരങ്ങള്ക്കു കൈമാറിയ ചെക്കുകളും ബൗണ്സ് ആയതായി വൃത്തങ്ങള് അറിയിച്ചു. അതേസമയം സര്ക്കാര് അക്കൗണ്ടില് മതിയായ ബാലന്സ് ഇല്ലെന്നാണ് മറുപടി ലഭിച്ചതെന്ന് അവാര്ഡ് ജേതാക്കളിലൊരാളായ അപരാജിത പൂജാരി പി.ടി.ഐയോട് പറഞ്ഞു. അസം സ്റ്റേറ്റ് ഫിലിം ഫിനാന്സ് & ഡെവലപ്മെന്റ് കോര്പ്പറേഷനാണ് (എഎസ്എഫ്എഫ്ഡിസി) സംസ്ഥാന ചലച്ചിത്ര അവാര്ഡ് ദാന ചടങ്ങ് സംഘടിപ്പിച്ചത്. ചെക്കുകളില് കള്ച്ചറല് അഫയേഴ്സ് ഡയറക്ടറാണ് ഒപ്പിട്ടിരിക്കുന്നത്. സംഭവത്തില് ഉടന് അന്വേഷണം നടത്താന് സാംസ്കാരിക മന്ത്രി ബിമല് ബോറ ഉത്തരവിട്ടു.
