ന്യൂഡല്‍ഹി: കിഴക്കന്‍ ലഡാക്കില്‍ ചൈനയുടെ ഭാഗത്തുനിന്നുണ്ടായ പ്രകോപനത്തിനു പിന്നില്‍ മറ്റെന്തോ ലക്ഷ്യമുണ്ടാകാമെന്ന് മുന്‍പ്രതിരോധമന്ത്രി എ.കെ ആന്റണി. 1975 നു ശേഷം ഇന്ത്യ-ചൈന അതിര്‍ത്തിയില്‍ ഇരുവിഭാഗത്തുനിന്നും ജീവഹാനിയുണ്ടായിട്ടില്ല. ഇപ്പോള്‍ ലഡാക്കിലുണ്ടായ ചൈനയുടെ പ്രകോപനം ഇന്ത്യ നിര്‍മിച്ച റോഡ് നിര്‍മാണം തടസപ്പെടുത്താന്‍ മാത്രമാണെന്ന് കരുതുന്നില്ല. അതിര്‍ത്തിയില്‍ ഇന്നലെ ഉണ്ടായ സംഘര്‍ഷത്തിന്റെ വിശദാംശങ്ങള്‍ പരസ്യപ്പെടുത്താന്‍ കേന്ദ്രസര്‍ക്കാര്‍ തയ്യാറാവണമെന്നും അദ്ദേഹം പറഞ്ഞു.
കേന്ദ്രസര്‍ക്കാരിന്റെ ഔദ്യോഗിക പ്രതികരണത്തിനായി താനും കാത്തിരിക്കുന്നു. കഴിഞ്ഞ ഏതാനും ആഴ്ചകളായിയി ലഡാക്കിലെ ചില തന്ത്രപ്രധാന മേഖലകളില്‍ ചൈനീസ് സൈന്യം കിലോമീറ്റുറുകളോളം കടന്നു കയറിയിട്ടുണ്ട്. സൈനികതല ചര്‍ച്ചയ്ക്ക് ഒപ്പം പ്രധാനമന്ത്രിയും വിദേശകാര്യമന്ത്രിയും അടക്കം ഇടപെട്ട് ഉന്നതതല ചര്‍ച്ചയിലേക്ക് നീങ്ങിയേ തീരുവെന്നും എ.കെ ആന്റണി പറഞ്ഞു.
