പത്തനംതിട്ട : ചിറ്റാർ കസ്റ്റഡി മരണത്തിൽ ജില്ല ക്രൈംബ്രാഞ്ച് അന്വേഷണത്തിൽ തൃപ്തിയില്ലെന്ന് മരിച്ച മത്തായിയുടെ കുടുംബം . അതിനാൽ ഹൈക്കോടതിയെ സമീപിക്കാനാണ് കുടുംബത്തിന്റെ തീരുമാനം.
റീ പോസ്റ്റ്മോർട്ടം നടത്തണമെന്നും മുഴുവൻ പ്രതികളെയും അറസ്റ്റ് ചെയ്യാൻ പുതിയ അന്വേഷണസംഘത്തെ നിയോഗിക്കണമെന്നും ആവശ്യപ്പെട്ട് തിങ്കളാഴ്ച ഹൈക്കോടതിയിൽ റിട്ട് ഹർജി നൽകാനാണ് ബന്ധുക്കളുടെ തീരുമാനം
വീട്ടുമുറ്റത്ത് പന്തൽകെട്ടി സമരം തുടങ്ങാനും കുടുംബം തീരുമാനിച്ചിട്ടുണ്ട് . ഇതിനിടെ മത്തായിയുടെ മൃതദേഹം സംസ്കരിക്കാത്ത സാഹചര്യത്തിൽ നിലപാട് മയപ്പെടുത്താൻ അടുത്ത ബന്ധുക്കളുമായി അധികൃതർ നടത്തിയ ചർച്ച പരാജയപ്പെട്ടിരുന്നു. പ്രതികളെ അറസ്റ്റ് ചെയ്യാതെ പിൻമാറില്ലെന്നും നീതികിട്ടുംവരെ സമരം തുടരുമെന്നുമാണ് ബന്ധുക്കൾ വ്യക്തമാക്കിയിരിക്കുന്നത് . ജനങ്ങളുടെ വികാരം ഉൾക്കൊണ്ട് സത്യസന്ധമായി കേസ് അന്വേഷിക്കണമെന്നും മത്തായിയുടെ കുടുംബത്തിന് ഉചിത നഷ്ടപരിഹാരം നൽകണമെന്നുമാണ് ഉയർന്നു വരുന്ന ആവശ്യം
