ഓമല്ലൂര്‍ : കര്‍ഷകരെയും സാധാരണക്കാരെയും സഹായിക്കുന്ന സഹകരണ മേഖല രോഗികള്‍ക്ക് ആശ്വാസം പകരുന്ന പദ്ധതി നടപ്പിലാക്കുന്നതില്‍ സഹകരണ വകുപ്പിനെ അഭിനന്ദിക്കുന്നതായി ജില്ലാ പഞ്ചായത്ത് പ്രസിഡന്റ്‌ ഓമല്ലൂര്‍ ശങ്കരന്‍ പറഞ്ഞു. കോഴഞ്ചേരി താലൂക്കിലെ സഹകരണ മെമ്പര്‍ റിലീഫ് ഫണ്ട് ധനസഹായ വിതരണം ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം.
കോഴഞ്ചേരി താലൂക്കിലെ 15 സഹകരണ ബാങ്കുകളുടെ 349 അംഗങ്ങള്‍ക്ക് 72.30 ലക്ഷം രൂപ നല്‍കി.
കോഴഞ്ചേരി താലൂക്ക് സര്‍ക്കിള്‍ സഹകരണ യൂണിയന്‍ ചെയര്‍മാന്‍ ജെറി ഈശോ ഉമ്മന്‍ അധ്യക്ഷത വഹിച്ചു.
വെള്ളപ്പൊക്കത്തില്‍ കിടപ്പാടങ്ങള്‍ നഷ്ടപ്പെട്ടവര്‍ക്ക് വീടുകള്‍ നല്‍കിയ സഹകരണ സ്ഥാപനങ്ങള്‍ക്ക് കെയര്‍ ഹോം പ്രശസ്തി പത്രം സഹകരണ ജോയിന്റ് രജിസ്ട്രാര്‍ എം.ജി പ്രമീള വിതരണം ചെയ്തു.
ഇലന്തൂര്‍ സര്‍വീസ് സഹകരണ ബാങ്ക് പ്രസിഡന്റ്‌ പി.ആര്‍. പ്രദീപ്, പത്തനംതിട്ട സര്‍വീസ് സഹകരണ ബാങ്ക് പ്രസിഡന്റ്‌ എ. ഷംസുദ്ദീന്‍, അസിസ്റ്റന്റ് രജിസ്ട്രാര്‍ കെ. അനില്‍, ഓഡിറ്റ് അസിസ്റ്റന്റ് ഡയറക്ടര്‍ ജി. ബിജു എന്നിവര്‍ പ്രസംഗിച്ചു.
