കുളനട : കുളനട പഞ്ചായത്തിലെ കടലിക്കുന്ന് മലയിലെ അനധികൃത മണ്ണെടുപ്പ് അവസാനിപ്പിക്കണമെന്നാവശ്യപ്പെട്ട് പൗരസമിതി ചേർന്നു. അപകടകരമായ രീതിയിലാണ് കുന്നിന്റെ മുകളിലെ മണ്ണെടുപ്പെന്ന് പ്രദേശവാസികൾ പറയുന്നു. ഇപ്പോൾത്തന്നെ ഏക്കർകണക്കിന് മല നിരന്നുകഴിഞ്ഞു. രാത്രിയും പകലും വലിയ ടിപ്പർലോറികളിൽ മണ്ണ് കടത്തുന്നത് നിസ്സഹായരായി നോക്കിനിൽക്കുകയായിരുന്നു നാട്ടുകാർ. ഞായറാഴ്ച ചേർന്ന പൗരസമിതിയോഗം സർക്കാരിനും ഹൈക്കോടതിക്കും പരാതി നൽകാനും ജനകീയപ്രതിരോധം നടത്താനും മണ്ണെടുപ്പ് അവസാനിപ്പിക്കുംവരെ അനിശ്ചിതകാലസമരം നടത്തുന്നതിനും തീരുമാനിച്ചു.
കുളനട ഗ്രാമപ്പഞ്ചായത്ത് പ്രസിഡന്റ് ചിത്തിര സി. ചന്ദ്രൻ ചെയർപേഴ്സണായും ഗ്രാമപ്പഞ്ചായത്തംഗം സന്തോഷ്കുമാർ, ജനറൽ കൺവീനറായും എം.ടി. കുട്ടപ്പൻ, കെ.സി. മണിക്കുട്ടൻ, വി. മോഹനൻപിള്ള എന്നിവർ വൈസ് ചെയർമാന്മാരായും എൻ.ടി. ആനന്ദൻ, എൻ.ജി. സണ്ണി, ശശി പന്തളം, എബി മലഞ്ചരുവിൽ, ശോഭനാ അച്യുതൻ എന്നിവർ കൺവീനർമാരായും കടലിക്കുന്ന് സംരക്ഷണസമിതി രൂപവത്കരിച്ചു. യോഗം ബ്ലോക്ക് പഞ്ചായത്തംഗം പോൾ രാജൻ ഉദ്ഘാടനം ചെയ്തു. സന്തോഷ് കുമാർ അധ്യക്ഷത വഹിച്ചു. പഞ്ചായത്തംഗങ്ങളായ ബിജു പരമേശ്വരൻ, വിനോദ്കുമാർ, പി.വി. വിജയൻ, ശശികലാ സുരേഷ്, വർഗീസ് ജോൺ, ആനന്ദൻപിള്ള എന്നിവർ സംസാരിച്ചു.
