തിരുവനന്തപുരം : സ്കൂള് വിട്ട് വീട്ടിലേക്ക് പോകുകയായിരുന്ന പത്താം ക്ലാസ് വിദ്യാര്ത്ഥിനിയെ പീഡിപ്പിക്കാന് ശ്രമിച്ച തുണിക്കച്ചവടക്കാരന് അറസ്റ്റില്. കിളിമാനൂരിലാണ് സംഭവം. കൊല്ലം, കൂട്ടിക്കട, അമ്മച്ചാന്മുക്ക്, റൂബി മന്സിലില് അല് അമീന് (32) ആണ് പിടിയിലായത്. കിളിമാനൂര് പോലീസ് സ്റ്റേഷന് പരിധിയില് 11-ന് വൈകുന്നേരം 4.30-നായിരുന്നു സംഭവം. സ്കൂളില് നിന്നും ഒറ്റയ്ക്കു നടന്നുവരികയായിരുന്ന പെണ്കുട്ടിയെ ആളൊഴിഞ്ഞ സ്ഥലത്തുവച്ച് ഇരുചക്രവാഹനത്തിലെത്തിയ പ്രതി കടന്നുപിടിക്കുകയായിരുന്നു.
വസ്ത്രങ്ങള് തവണവ്യവസ്ഥയില് വീടുകള്തോറും വില്ക്കുന്നയാളാണ് പ്രതി. കുതറിയോടി രക്ഷപ്പെട്ട പെണ്കുട്ടി വീട്ടിലെത്തി വിവരം പറഞ്ഞു. രക്ഷിതാക്കള് പോലീസില് പരാതി നല്കിയതിനെത്തുടര്ന്ന് അമ്പതോളം നിരീക്ഷണ ക്യാമറാ ദൃശ്യങ്ങള് പോലീസ് പരിശോധിച്ചു. അന്വേഷണത്തിനിടെ ലഭിച്ച രഹസ്യവിവരത്തിന്റെ അടിസ്ഥാനത്തിലാണ് അറസ്റ്റ്. പ്രതി സഞ്ചരിച്ചിരുന്ന ഇരുചക്രവാഹനവും പോലീസ് കസ്റ്റഡിയിലെടുത്തു. കിളിമാനൂര് എസ്.എച്ച്.ഒ. എസ്.സനൂജ്, എസ്ഐ. വിജിത്ത് കെ.നായര്, സുനില് എന്നിവരടങ്ങിയ സംഘമാണ് പ്രതിയെ അറസ്റ്റുചെയ്തത്.
