ശ്രീനഗര് : തെക്കന് കശ്മീരിലെ അമര്നാഥ് ഗുഹാക്ഷേത്രത്തിനു സമീപം മേഘവിസ്ഫോടനത്തെത്തുടര്ന്ന് മഴവെള്ളം കുത്തിയൊലിച്ചുണ്ടായ ദുരന്തത്തില് പതിനഞ്ചുപേര് മരിച്ചതായി റിപ്പോര്ട്ടുകള്. നാല്പതിലേറെപ്പേരെ കാണാതായി. ഇതുവരെ 15,000ലേറെ പേരെ രക്ഷപ്പെടുത്തിയതായി എന്ഡിടിവി റിപ്പോര്ട്ട് ചെയ്തു. പരിക്കേറ്റവരെ എയര് ആംബുലന്സില് ആശുപത്രികളിലേക്കു മാറ്റി. രണ്ടുവര്ഷത്തെ ഇടവേളയ്ക്കുശേഷം അമര്നാഥ് തീര്ഥാടനം പുരോഗമിക്കുന്നതിനിടെയുണ്ടായ ദുരന്തം കടുത്ത ആശങ്ക ഉയര്ത്തി.
വെള്ളിയാഴ്ച വൈകീട്ട് 5.30-നാണ് അപകടം. പെട്ടെന്നുള്ള പേമാരിയില് ഗുഹാമുഖത്തിനു മുകളില്നിന്നും വശങ്ങളില്നിന്നും വെള്ളവും ചെളിയും കുത്തിയൊലിക്കുകയായിരുന്നു. തീര്ഥാടകര്ക്ക് ഭക്ഷണം നല്കുന്ന 25 ടെന്റുകളും മൂന്ന് സമൂഹ അടുക്കളകളും കനത്ത മലവെള്ളപ്പാച്ചിലില് ഒലിച്ചുപോയി. ദേശീയ-സംസ്ഥാന ദുരന്തനിവാരണസേനയുടെ നേതൃത്വത്തില് രക്ഷാപ്രവര്ത്തനം തുടങ്ങി. ഇന്ത്യന് സൈന്യവും ഇന്തോ – ടിബറ്റന് ബോര്ഡര് പോലീസ്, എന്ഡിആര്എഫിന്റെ മൂന്ന് സംഘങ്ങളും രക്ഷാപ്രവര്ത്തനത്തില് പങ്ക് എടുക്കുന്നുണ്ട്.
