പുനലൂര് : പുനലൂരില് യുവതിയെ വീട്ടില് കൊല്ലപ്പെട്ട നിലയില് കണ്ടെത്തി. മണിയാര് സ്വദേശി മഞ്ജുവാണ് (35) മരിച്ചത്. മഞ്ജുവിനെ ഭര്ത്താവ് മണികണ്ഠന് ശ്വാസം മുട്ടിച്ച് കൊന്നതാകാമെന്നാണ് സംശയം. കൈഞരമ്പ് മുറിച്ച ഭര്ത്താവിനെ പുനലൂര് താലൂക്ക് ആശുപത്രിയില് പ്രവേശിപ്പിച്ചു. ഇന്ന് രാവിലെയാണ് സംഭവം. യുവതിയുടെ മൃതദേഹം കണ്ടെത്തുമ്പോള് മുഖത്ത് തലയണ ഇരിക്കുന്നുണ്ടായിരുന്നു. മഞ്ജുവിനെ തലയണ ഉപയോഗിച്ച് ശ്വാസം മുട്ടിച്ച് കൊലപ്പെടുത്തിയ ശേഷം ഭര്ത്താവ് ആത്മഹത്യയ്ക്ക് ശ്രമിച്ചതാവാം എന്നാണ് പ്രാഥമിക നിഗമനം. മഞ്ജുവും ഭര്ത്താവ് മണികണ്ഠനും തമ്മില് എന്നും വഴക്കും ബഹളവുമായിരുന്നുവെന്നാണ് പോലീസ് പറയുന്നത്.
കഴിഞ്ഞയാഴ്ച്ചയും പോലീസ് സ്റ്റേഷനില് വെച്ച് ഇവരുടെ പ്രശ്നങ്ങള് പരിഹരിച്ച് വീട്ടിലേക്ക് അയച്ചതാണ്. ഇവരുടെ രണ്ട് കുട്ടികളും മഞ്ജുവിന്റെ സഹോദരനൊപ്പമാണ് താമസിച്ചിരുന്നത്. കഴിഞ്ഞ ദിവസം മദ്യപാനിയായ ഭര്ത്താവ് വീട്ടിലെത്തി മക്കള് എവിടെയെന്ന് ചോദിച്ച് മഞ്ജുവിനെ ഉപദ്രവിച്ചിരുന്നതായി നാട്ടുകാര് പറയുന്നു.
