തിരുവനന്തപുരം: കൊവിഡ് പോസിറ്റീവ് ആണെങ്കിലും ഗുരുതര രോഗമുള്ളവര്ക്ക് ചികിത്സ നിഷേധിച്ചാല് കര്ശന നടപടി സ്വീകരിക്കുമെന്ന് മുഖ്യമന്ത്രി പിണറായി വിജയന്. ഇത് സംസ്ഥാനത്തെ എല്ലാ സര്ക്കാര് സ്വകാര്യ ആശുപത്രികള്ക്കും ബാധകമാണെന്ന് കൊവിഡ് അവലോകന യോഗത്തില് മുഖ്യമന്ത്രി പറഞ്ഞു. സംസ്ഥാനത്ത് കൊവിഡ് വ്യാപനത്തില് നേരിയ കുറവ് അനുഭവപ്പെടുന്നതായി മുഖ്യമന്ത്രി വ്യക്തമാക്കി. ആദ്യഘട്ടത്തില് കൊവിഡ് വ്യാപനം വര്ദ്ധിച്ച് നിന്ന തിരുവനന്തപുരം, വയനാട്, കാസര്ഗോഡ് ജില്ലകളില് വ്യാപനം കുറഞ്ഞിട്ടുണ്ട്. ആശുപത്രികളിലും ഐസിയുവിലും പ്രവേശിപ്പിക്കുന്നവരുടെ എണ്ണം കണക്കിലെടുക്കുമ്പോൾ സ്ഥിതിഗതികള് നിയന്ത്രണത്തിലാണ്. സംസ്ഥാനത്തെ രണ്ടാം ഡോസ് വാക്സിനേഷന് 84 ശതമാനവും കുട്ടികളുടെ വാക്സിനേഷന് 71 ശതമാനവും പൂര്ത്തീകരിച്ചു. വാക്സിനേഷന് ത്വരിതപ്പെടുത്താന് ആരോഗ്യ വകുപ്പിനോട് മുഖ്യമന്ത്രി നിര്ദ്ദേശിക്കുകയും ചെയ്തു.
