മലപ്പുറം : കോണ്ഗ്രസിനും ബിജെപിക്കുമെതിരെ രൂക്ഷ വിമര്ശനവുമായി മുഖ്യമന്ത്രി പിണറായി വിജയന്. കോണ്ഗ്രസ് അനുദിനം ശോഷിച്ചുകൊണ്ടിരിക്കുകയാണെന്നും ഒരിക്കലും കോണ്ഗ്രസ് ബിജെപിക്ക് ബദലാവില്ലെന്നും മുഖ്യമന്ത്രി മലപ്പുറം ജില്ലാ സമ്മേളനത്തില് പറഞ്ഞു. ”ബിജെപിയുടെ അതേ നയമുള്ള ഒരു പാര്ട്ടിയായെ കോണ്ഗ്രസിനെ കാണാന് കഴിയൂ. കോണ്ഗ്രസ് വര്ഗീയതയോട് സമരസപ്പെട്ടു. ഇപ്പോഴും പാഠം പഠിച്ചില്ല. നിരവധി നേതാക്കള് ബിജെപിക്കാരായി മാറി. ഇതിന്റെ ഭാഗമായാണ് രാഹുല് ഗാന്ധി ഇവിടെ ഹിന്ദുവിന്റെ ഭരണമാണ് വേണ്ടതെന്ന് പറഞ്ഞത്. ജനങ്ങളുടെ വിശ്വാസം നഷ്ടപ്പെട്ട പാര്ട്ടിയാണ് കോണ്ഗ്രസ്.”-മുഖ്യമന്ത്രി പറഞ്ഞു.
യഥാര്ത്ഥ സ്വാതന്ത്ര്യ സമര സേനാനികള് ആരും ബ്രിട്ടീഷുകാര്ക്ക് മാപ്പ് എഴുതി കൊടുത്തവരല്ല. മാപ്പ് എഴുതിക്കൊടുത്ത സവര്ക്കര് എങ്ങനെയാണ് വീര് സവര്ക്കറാകുക. സവര്ക്കറുടെ യഥാര്ത്ഥ റോള് വഞ്ചകന്റെതാണെന്നും വാരിയംകുന്നന് ബ്രിട്ടീഷുകാരുടെ വെടിയുണ്ട നേര്ക്ക് നിന്ന് ഏറ്റുവാങ്ങിയ ആളാണെന്നും മുഖ്യമന്ത്രി പറഞ്ഞു. ന്യൂനപക്ഷങ്ങള്ക്ക് നേരെ സംഘ പരിവാറിന്റെ വേട്ടയാണ് നടക്കുന്നത്. മുസ്ലിംങ്ങളും ക്രിസ്ത്യാനികളും രാജ്യത്തിന്റെ വിവിധയിടങ്ങളില് ആക്രമിക്കപ്പെടുകയാണെന്നും മുഖ്യമന്ത്രി പറഞ്ഞു.
