കാസര്‍കോട്: കാസര്‍കോട് പടന്ന സര്‍ക്കാര്‍ സ്‌കൂളില്‍ യുപി അദ്ധ്യാപകന്‍ വിദ്യാര്‍ത്ഥിനിയെ ക്ലാസില്‍ വെച്ച്‌ ക്രൂരമായി മര്‍ദ്ദിച്ചതായി പരാതി.ഏഴാം ക്ലാസ് വിദ്യാര്‍ത്ഥിനിയെ ഷാള്‍ കൊണ്ട് കഴുത്ത് മുറുക്കിയെന്നും പുറത്ത് ഇടിച്ചു എന്നുമാണ് പരാതി. സംഭവത്തില്‍ ചന്തേര പോലീസ് കേസെടുത്തു. കഴിഞ്ഞ മാസം 19 നാണ് കേസിനാസ്പദമായ സംഭവം. പടന്ന സര്‍ക്കാര്‍ യു പി സ്‌കൂളില്‍ പഠിക്കുന്ന ഏഴാം ക്ലാസ് വിദ്യാര്‍ത്ഥിനിയ്‌ക്കാണ് മര്‍ദനമേറ്റത്. കണക്ക് തെറ്റിച്ചതിന് അദ്ധ്യാപകന്‍ മനോജ് മര്‍ദ്ദിക്കുകയായിരുന്നുവെന്ന് പെണ്‍കുട്ടി ആരോപിക്കുന്നു.
കഴുത്തിന് കടുത്ത വേദന ഉണ്ടെന്നും ഒപ്പം പനിയും ഛര്‍ദിയും ഉണ്ടെന്ന് 12 വയസുകാരിയായ വിദ്യാര്‍ത്ഥി പറഞ്ഞു. അദ്ധ്യാപകനെ സ്ഥലം മാറ്റാമെന്ന മദ്ധ്യസ്ഥരുടെ ഉറപ്പില്‍ പോലീസില്‍ പരാതി നല്‍കിയില്ലെന്നും നടപടിയുണ്ടാകാത്തതിനാല്‍ പിന്നീട് ബാലാവകാശ കമ്മീഷനിലും പോലീസിലും പരാതി നല്‍കുകയായിരുന്നുവെന്നും പിതാവ് വ്യക്തമാക്കി.
ജുവനൈല്‍ ജസ്റ്റിസ് ആക്‌ട് പ്രകാരം ചന്തേര പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ആരോപണ വിധേയനായ അദ്ധ്യാപകന്‍ ഇപ്പോള്‍ മെഡിക്കല്‍ ലീവിലാണ്. അദ്ധ്യാപകന്‍ മര്‍ദിച്ചിട്ടില്ലെന്നാണ് സ്‌കൂള്‍ അധികൃതര്‍ വ്യക്തമാക്കുന്നത്. വീണ്ടും ആ സ്‌കൂളിലേക്ക് പോകാന്‍ പേടിയാണെന്ന് വിദ്യാര്‍ത്ഥി പറയുന്നു. ഇതോടെ കഴിഞ്ഞ ദിവസം സ്‌കൂളില്‍ നിന്ന് ടിസി വാങ്ങി മറ്റൊരു സ്‌കൂളില്‍ ചേര്‍ത്തു. അദ്ധ്യാപകനെതിരെ കര്‍ശന നടപടി വേണമെന്ന് പെണ്‍കുട്ടിയുടെ കുടുംബം ആവശ്യപ്പെട്ടു
