ന്യൂഡല്ഹി : കോണ്ഗ്രസിന്റെ മാധ്യമ വിഭാഗത്തിന്റെ മേധാവിയായി മുന് കേന്ദ്രമന്ത്രിയും മുതിര്ന്ന നേതാവുമായ ജയ്റാം രമേശിനെ നിയമിച്ചു. മാധ്യമ പ്രചാരണ വിഭാഗങ്ങളുടെ ചുമതലയുള്ള ജനറല് സെക്രട്ടറിയായി ജയ്റാം രമേശിനെ നിയമിച്ചതായി കോണ്ഗ്രസ് നേതൃത്വം അറിയിച്ചു. രണ്ദീപ് സിംഗ് സുര്ജേവാലയെ മാറ്റിയാണ് ജയ്റാം രമേശിനെ വിഭാഗത്തിന്റെ ചുമതലയേല്പ്പിച്ചത്. കമ്മ്യൂണിക്കേഷന്റെ ചുമതലയുള്ള ജനറല് സെക്രട്ടറിയുടെ നിലവിലെ ചുമതലയില് നിന്ന് സുര്ജേവാലയെ ഒഴിവാക്കിയതായും കര്ണാടകയുടെ ചുമതലയുള്ള ജനറല് സെക്രട്ടറിയായി തുടരുമെന്നും പാര്ട്ടി പുറത്തിറക്കിയ പ്രസ്താവനയില് പറയുന്നു. മുന് കേന്ദ്രമന്ത്രിയും രാജ്യസഭാ എംപിയുമായ ജയറാം രമേശിനെ പാര്ട്ടി അധ്യക്ഷ സോണിയ ഗാന്ധിയാണ് മാധ്യമ മേധാവിയായി നിയമിച്ചത്.
ഉദയ്പൂരില് നടന്ന ചിന്തന് ശിബിരത്തില് നിലവിലെ മാധ്യമ പ്രചാരണ വിഭാഗത്തിന് വലിയ വിമര്ശനം നേരിട്ടിരുന്നു. വിഭാഗത്തിന്റെ അധികാരപരിധിയും വ്യാപ്തിയും ഘടനയും വിപുലീകരിക്കണമെന്നും വിഷയ വിദഗ്ധരുടെ സഹായത്തോടെ കൂടുതല് കാര്യക്ഷമമാക്കണമെന്നും അഭിപ്രായം ഉയര്ന്നിരുന്നു. ഇത് കൂടി പരിഗണിച്ചാണ് പുതിയ നിയമനമുണ്ടായിരിക്കുന്നത്.
